Тұрғын үйдегі өрт қауіпсіздігі

Электр құралдарын ұзақ уақыт қосулы қалдыру, электр сымдарының ескіруі немесе дұрыс орнатылмауы, газ плиталары мен пештердің дұрыс пайдаланылмауы, темекі шегу кезінде абайсыздық таныту, балалардың сіріңке немесе от көздерімен ойнауы, пеш пен каминдерді шамадан тыс қыздыру тұрғын үйлерде өрттің шығуына әкеліп соғады.

Өрттің алдын алу – оның салдарын жоюдан әлдеқайда жеңіл және тиімді. Ол үшін нақты ережелерді сақтау қажет. Атап айтқанда, электр жабдықтарын тексеріп тұру. Сымдардың бүтіндігін, розеткалардың күйін бақылаңыз. Газ құралдарын қауіпсіз пайдалану. Газдың иісі сезілсе, дереу жабдықты өшіріп, терезені ашып, төтенше қызметке хабарласыңыз. Отпен абай болу. Үйде темекі шекпеу, әсіресе төсекте немесе диванда шегуге болмайды. Балаларды қадағалау. Балаларға сіріңке мен жанғыш заттарды ұстатпау керек. Отқа төзімділік шаралары. Пеш, камин, электр құралдары жанғыш материалдардан қашық орнатылуы тиіс. Өрт сөндіргіш құрал ұстау. Әр үйде өрт сөндіргіш немесе су құйылған шелек дайын тұрғаны дұрыс.

Өрт шыққан жағдайда дүрбелеңге салынбай, дереу 101 немесе 112 нөміріне хабарласыңыз. Үйден тез және қауіпсіз жолмен шығып кетіңіз. Егер түтін көп болса, төмен иіліп, дымқыл мата арқылы дем алыңыз. Лифтті қолданбаңыз – баспалдақ арқылы эвакуациялаңыз. Үйде басқа адамдар болса, оларды ескертіңіз және көмектесіңіз.

Өрт қауіпсіздігін сақтау – тек мамандардың емес, әрбір азаматтың борышы. Уақытылы сақтық шараларын орындау арқылы өз өміріңізді, отбасыңызды және мүлкіңізді қорғауға болады. «Өрттің алдын алу – қауіпсіз өмір кепілі» екенін ұмытпаңыз!

Қазалы ауданы Төтенше жағдайлар

бөлімінің бас маманы азаматтық қорғау майоры