«Алтын күз – 2025»: Еңбек озаттары – марапат төрінде

Қазалы мәдени-демалыс кешенінің алдында өткен мерекелік шараға облыс әкімінің орынбасары Бахыт Жаханов арнайы қатысып, аудан жұртшылығы мен ауыл шаруашылығы саласының еңбеккерлеріне аймақ басшысы Нұрылбек Нәлібаевтың құттықтауын жеткізді.

- Баршаңызды ұлттық мереке - Республика күнімен және «Алтын күз» мерекесімен шын жүректен құттықтаймын! Сыр елінің қамбасын молайтып, береке мен бірліктің үлгісін көрсеткен аймағымыздың диқаншылар қауымы бүгін ерен еңбектің төріне шығуда.

Президентіміздің, Үкіметтің ерекше қолдауымен «Алаштың анасы» атанған қасиетті Сыр өңірінде соңғы жылдары байыпты бастамалар қолға алынып, жаңа жобалар сәтті жүзеге асуда. Облысымыздың бюджеті 851 млрд. 300 млн. теңгеге жетіп, 2022 жылдан бері 233 пайызға өсті.

Бұл қаражат аймағымыздың ең өзекті деген мәселелерін шешуге, тұрғындардың өмір сүру сапасын жақсартуға, жаңа инфрақұрылымдық жобаларды іске асыруға бағытталуда. 2021 жылы өңірімізге 308 млрд. теңге инвестиция тартылса, биылғы жылы 720 млрд. теңге тартылады. Облыс экономикасының негізі саласы - агроөнеркәсіп кешені де қарқынды дамуда. Соңғы 3 жыл ішінде мемлекет тарапынан аграрлық саланы қолдауға 43 млрд. теңге қаржы бөлінді. Шаруашылықтар есебінен 41 млрд. теңгеден астам инвестиция тартылды. Ауыл шаруашылығының жалпы өнімі көлемі жыл сайын артып, осы жылы 234 млрд. 800 млн. теңгеге жетеді. Бүгінде, осы қолдаулардың арқасында ерте көктемнен қара күзге дейін күннің ыстық-суығына қарамай еңбек еткен Сыр диқандары межелі өнімге қол жеткізуде. Жыл сайын «Алтын күз» мерекеcін тойлаудың игі дәстүрін жалғап, адал еңбегімен төрге шыққан озаттарды марапаттаудың алтын арқауын үзбей келеміз. Еңбек адамдарын құрметпен марапат төріне шығару – біз үшін үлкен мәртебе. Қадірлі қауым! Қамбамыз әрдайым дәнге, қорамыз малға толып, халқымыздың құт-берекесі арта бергей. Баршаңызды Республика күнімен және ырыс-несібеге толы молшылық мерекесімен тағы да құттықтаймын, - деді Бахыт Дүйсенұлы.

Мұнан кейін, облыс әкімінің орынбасары аймақ басшысы Нұрлыбек Нәлібаевтың Республика күні мен «Алтын дән-2025 мерекесіне орай жолдаған құттықтауын аудан әкімі Алмасбек Есмахановқа табыстады. Сонымен қатар ҚР ауыл шаруашылығы министрлігінің «Құрмет грамотасымен» «Береке» шаруа қожалығының жетекшісі Жамаладин Өтеевті, Қызылорда облысының «Құрмет грамотасымен» «Қазалысушар» өндірістік учаскесінің басшысы Нұрлан Әбділдаев марапаттады. Сондай-ақ аймақтың ауыл шаруашылығы саласына үлес қосып жүрген азаматтарға облыс әкімінің «Алғыс хатын» табыстады.

Салатанатты шарада аудан әкімі Алмасбек Есмаханов «Алтын дән – 2025» салтанатты шарасы аясында ауыл шаруашылық саласының озаттарын облыс және аудан әкімдерінің «Алғыс хаттарымен» марапаттады. Сонымен қатар жылдағы дәстүрге сай өңірдің агроөнеркәсіп кешені саласында үздік жетістіктерге жеткен еңбек озаттары да марапатқа ие болды. Атап айтсақ, «Озат бақташы», «Озат шопан», «Озат жылқышы», «Озат түйекеш», «Озат ветеринар», «Озат бидай өсіруші», «Озат жоңышқа өсіруші», «Озат көкөніс өсіруші», «Озат мақсары өсіруші», «Озат агроном», «Озат картоп өсіруші», «Озат бақша өсіруші», «Озат гидротехник», «Озат күріш өсіруші», «Озат жатка машинисі», «Озат комбайншы», «Озат бригадир», «Озат егін шаруашылығы», «Озат телеарна тілшісі», «Озат газет тілшісі» номинациялары берілді.

Сондай-ақ «Үздік шаруашылық» номинациясы бойынша ІIІ дәрежелі дипломмен «Мерей» шаруа қожалығы, «Үздік шаруашылық» номинациясы бойынша ІІ дәрежелі дипломмен «Агро-Өркен» жауапкершілігі шектеулі серіктестігі және «Агроөнеркәсіп кешенін дамытуда биылғы жылы ең жоғарғы көрсеткіштерге қол жеткізген «Рза-Агро» жауапкершілігі шектеулі серіктестігі «ҮЗДІК ШАРУАШЫЛЫҚ» номинациясы бойынша аудан әкімінің І дәрежелі дипломымен марапатталады.

Салтанатты шара соңы дала еңбеккерлерінің құрметіне орай аудан өнерпаздарының концерттік бағдарламасына ұласты.