Жасұланның жеңісті жолы

Жасұлан Кенжеғұлұлы Қызылорда локомотив пайдалану депосына қарасты ТД-23 Қазалы айналым депосында жүк тасымалы бағыты бойынша қызмет етеді. Теміржол саласына 2014 жылы келген ол еңбек жолын машинист көмекшісі болып бастаған.

2015-2019 жылдары таспа талдау инженері болып қызмет атқарды. 2021 жылдан бастап тепловоз машинисі ретінде теміржол бойындағы жауапты қызметін жалғастыруда.

Жасұлан 2022 жылы үшінші класс, ал 2024 жылы екінші класс біліктілік дәрежесіне ие болды. Сол жылы Қарағанды қаласында өткен еліміздің 30 локомотив депосы арасындағы байқауда жүлделі I орынды жеңіп алып, "Жыл машинисі" атағына лайық деп танылды.

Бұл жетістіктің нәтижесінде ол 2025 жылы Ресейдің Екатеринбург қаласында өткен РТЖ АҚ ұйымдастырған "Кәсіпқойлар чемпионатына" Қазақстаннан алғаш қатысқан маман ретінде жолдама алды. Жарысқа дайындық үш айға созылып, Жасұлан кәсіби нұсқаулықтар мен техникалық әдебиеттерді мұқият зерттеді. Осы жолда оған Қызылорда локомотив пайдалану депосының басшысы Н.Байғазы, Қазалы айналым депосының басшысы Р.Тілеумбетов, жарысқа бірге барған нұсқаушы С. Сарықұлов сынды азаматтар үлкен қолдау көрсетіп, дайындыққа барлық жағдай жасаған.

Осылайша, ол үздіксіз ізденіс пен тыңғылықты дайындықтың нәтижесінде екінші орынды қанжығаға байлады. Халықаралық дода 5 елдің қатысуымен өтті. 3600-ден аса үміткер 60-тан астам теміржол мамандығы бойынша бақ сынады. Жасұланның айтуынша, жарыс өте жоғары деңгейде ұйымдастырылған. Тиісінше, тапсырмалар да да оңай болмапты. Қатысушыларға кәсіби білімін ғана емес, қауіпсіздік талаптарын сақтау, стандарттан тыс жағдайлардан шығу секілді күрделі міндеттер қойылған.

Дегенмен кәсіби маман қаншама үміткерлердің арасынан екінші орынға жайғасып, еліміздің теміржол саласы білікті мамандарға бай екенін аңғартты. Қиындығы мол сайыста Жасұлан білімін, тәжірибесін, жылдар бойы жинақтаған кәсіби машығын көрсете білді.

– Жарысқа әр елдің таңдаулы мамандары келген. Шыны керек, тек ауданның емес, елдің абыройын арқалау – үлкен жауапкершілік. Сондықтан өзіме артылған үмітті ақтауға барынша тырыстым. Бар оқып-тоқығанымды, тәжірибемді, жинаған білімімді салып, әр тапсырмаға шын ниетпен кірістім. Соның нәтижесі – жүлделі екінші орын. Сайыс барысында және дайындық кезеңінде қолдау білдіріп, сенім артқан Қазалы локомотив айналым депосы ұжымы мен басшылыққа, сондай-ақ «Қазақстан темір жолы» компаниясының жетекшілігіне алғысым шексіз. Әсіресе, кәсіби дамуыма ықпал етіп, бағыт-бағдар берген әріптестеріме ризашылығым зор. Бұл жетістік – тек менің емес, бүкіл ұжымның ортақ жемісі деп білемін. Алдағы уақытта да қолдауға лайық болуға, білім мен біліктілігімді одан әрі жетілдіріп, ел сенімін ақтауға барымды саламын, – дейді маман.

Жасұлан Смағұлдың халықаралық деңгейде қол жеткізген табысы – еліміздің теміржол саласында сапалы кадрлар даярланып жатқанын айғақтайтын жарқын мысал. Ол тек өзінің кәсіби біліктілігін ғана емес, аудан абыройын қорғап, Қазақстанның беделін де биіктетті. Мұндай мамандар кейінгілерге үлгі болары анық. Өйткені ол сынды білікті мамандардың табандылығы мен еңбексүйгіштігі – теміржол саласының дамуына серпін беріп қана қоймай, болашаққа деген сенімді де нығайтады. Алдағы уақытта да ол кәсіби білігін одан әрі шыңдап, білімін арттырып, жаңа белестерді бағындырары сөзсіз. Біз де Жасұланның жеңісті жолы жалғасын тапсын деп тілейміз.