Қазалылық спортшылар марапат төрінде
Елімізде жыл сайын тамыз айының үшінші жексенбісінде спортшылардың кәсіби мерекесі аталып өтіледі. Осыған сәйкес, бүгін Әйтеке би кенттік Мәдениет үйінде мереке иелеріне арналған салтанатты шара өтті. Салтанатты шара басталмас бұрын келген қонақтар алдымен мәдениет үйінің фоесінде аудан спортшыларының жетістіктерінен әзірленген көрмені тамашалады.Мерекелік шараға аудан спортшылары, спорт саласының ардагерлері, жаттықтырушылар, дене тәрбиесінің мұғалімдері қатысты. Жиында аудан әкімінің міндетін атқарушы Жалғас Сүйеубаев сөз сөйлеп, спортшыларды кәсіби мерекелерімен құттықтады.
- Спорт – елдің мерейін асырып, абыройын тасытатын сала. Жыл сайын қазалылық спортшыларымыз түрлі деңгейдегі ірі жарыстарда топ жарып, аудан абыройы асқақтай түсуде. Қазіргі таңда ауданымызда 32 мыңнан астам тұрғын спортпен жүйелі түрде шұғылданады. Бұл - өңір халқының 40 пайызы.
Спорт түрлері бойынша жерлестеріміз биылдың өзінде Азия чемпионаттарында 1 алтын, 2 күміс, 1 қола медаль жеңіп алса, Халықаралық турнирлерде 3 күміс, 2 қола медальды қоржынға салды. Сонымен қатар, спортшыларымыз ҚР-ның чемпионаттарында, 9 алтын, 12 күміс, 16 қола медальға қол жеткізді. Спортшыларымыз алдағы уақытта да Қазыналы Қазалы ауданының мерейін асырып, даңқын шығарып, үлкен жетістіктерге қол жеткізе береді деп сенемін, – деді Жалғас Оңғарұлы.
Мұнан соң ел спортының дамуына сүбелі үлес қосып жүрген сала ардагерлері мен бірқатар жаттықтырушылар, дене тәрбиесінің мұғалімдері және спортшылар
Қазақстан Республикасы Туризм және спорт министрлігінің, Қазалы ауданы әкімдігінің «Құрмет грамотасымен» және облыс әкімі мен аудан әкімінің міндетін атқарушының, облыстық дене шынықтыру, спорт және туризм басқармасының «Алғыс хатымен» марапатталды.Мерекелік шарада спорт саласының ардагерлеріне арнайы мерекелік сыйлақтар табысталып, аудан өнерпаздары спортшылардың құрметіне ән салып, жиналғандарға көтеріңкі көңіл-күй сыйлады.
