Жаңа кассациялық соттар жұмысын бастады

2 шілдеде Астана қаласында соттардың ресми ашылу рәсімі өтті. Іс-шараға Жоғарғы Сот төрағасы Асламбек Мерғалиев пен Президенттің құқықтық мәселелер жөніндегі көмекшісі Ержан Жиенбаев қатысты. Жаңа соттардың төрағалары да таныстырылды:

Азаматтық істер жөніндегі сотты – Асқар Смайылов,

Қылмыстық істер жөніндегі сотты – Ақан Жұмағұлов,

Әкімшілік істер жөніндегі сотты – Берік Нәжімиденов басқаратын болды.

Жаңа құрылымға судьялар конкурс арқылы іріктелді. Барлығы 334 үміткердің арасынан 75 судья тағайындалды. Олардың орташа жасы – 52, кәсіби тәжірибесі – 20 жыл. Таңдалғандардың 65 пайызы – әйелдер. Үміткерлерді бағалауда кәсіби біліктілікпен қатар, этика, ашықтық, БАҚ пен заңгерлік қауымдастықтың пікірі ескерілген.

Бұрын кассациялық деңгейде тек шектеулі істер қаралып, өтініштердің аз бөлігі ғана қабылданатын. Енді "жаппай кассация" жүйесі енгізілді:

Барлық арыздар міндетті түрде қаралады;

Әр іс алты ай ішінде шешілуі тиіс;

Жоғарғы Сот енді тек ерекше жағдайларда араласып, негізінен сот тәжірибесін жинақтау мен заңнаманың бірізділігін қамтамасыз етуге назар аударады.

Жаңа кассациялық соттардың құрылуы – әділдік пен ашықтыққа бағытталған сот реформасының маңызды қадамы. Оның басты артықшылықтары:

Азаматтар үшін сот төрелігіне қолжетімділіктің артуы;

Апелляциялық және бірінші сатыдағы соттардың шешім сапасының жақсаруы;

Жоғарғы Соттың тиімділігінің артуы;

Сот жүйесіне деген сенімнің нығаюы.

Бұл өзгеріс қоғамда әділеттілікті қамтамасыз етуге, құқық үстемдігін күшейтуге және сот билігінің тәуелсіздігін бекітуге жол ашады.

Абылайхан Арғынұлы