Сайлаушылардың ұсыныс-пікірлері ұсынылды

Бүгін аудандық мәслихат төрағасы, партия филиалының төрағасы Ғазиз Әліш пен партия филиалының Атқарушы хатшысы, аудандық мәслихат депутаты Нұрғиса Жалғасбаев Арықбалық ауылдық округіндегі «Арықбалық» бастауыш партия ұйымында болып сайлаушылармен кездесті.
Өз кезегінде аманаттықтар депутаттық қызметтері бойынша жасаған жұмыстарын тізбектеп, мәслихаттың жыл ішінде атқарған жұмыстары туралы хабардар етті. Сонымен қатар партияның сайлауалды бағдарламасының ауданда орындалу нәтижесіне тоқталды.

Кездесу барысында партия филиалының төрағасы Ғазиз Әліш 2025 жылдың 29 маусымына тағайындалған Арықбалық ауылдық округі әкімінің сайлауына байланысты ауыл тұрғындарына алдағы саяси науқанның маңыздылығын айтып, үміткер Нұркен Сералиевке сайлау күні қолдау білдіріп, дауыс беруге шақырды.

Ауыл ақсақалдары үміткерге сәттілік тілеп, баталарын берді. Жиын соңында айтылған ұсыныс-пікірлерге Ғазиз Әлмәмбетұлы мен Нұрғиса Жаппарбергенұлы жауап беріп, көтерілген мәселелердің бақылауда болатынын және кезең-кезеңімен шешімін табатынын атап өтті.