Жастарды қолдау мен жаңа мүмкіндіктерге жол ашу – мемлекетік саясаттың маңызды бөлігі
Ел болашағы қашан да жастарға тәуелді. Мемлекет болашағының стратегиялық ресурсы, қоғамның қозғаушы күштерінің аудандағы ахуалы қандай? Оларды қолдау бағытында жұмыс істейтін Қазалы аудандық «Жастар ресурстық орталығының» бүгіні мен алдағы жоспарлары туралы мекеме басшысы Нұрбек Ақпанбетовтен сұрап білдік.– 2015 жылы қабылданған «Мемлекеттік жастар саясаты туралы» заңда жастардың толыққанды мәдени, рухани дамуы мемлекеттік жастар саясатының негізгі мақсаты екенін айтылып, олардың кәсіби біліктілігінің артуы, дамуына басымдылық беріліп келеді. Ал өзіңіз тізгінін ұстап отырған орталық қызметінің логикасы қандай?
– Жастарды қолдау, олардың потенциалын арттырып, мүмкіндіктеріне маңыз беру – мемлекеттік саясаттың ажырамас бөлшегі. Оның аясы жыл сайын артып келе жатқанына өздеріңіз де куәсіздер. Біздің мекеме аудандағы жастар саясатына ден қойып, мемлекеттік жастар туралы заңның 23-ші бабы бойынша аталмыш санатқа кіретін азаматтарды қолдауға бағытталған. Биылғы жылды ҚР Президенті Қасым-Жомарт Тоқаев «жұмысшы мамандықтар жылы» деп жариялаған болатын. Сол бойынша Жолдауда көтерілген және осы бағыттағы өзге де бағдарламалар, құжаттар аясында жұмыспен қамту, кәсіпкерлік бағдарламалар бойынша жастарға қажетті бағыт-бағдар береміз. Жастар орталығы қызметі тек кеңес берумен шектелмейді, қазалылылық жастардың әрі қарай жұмыс табуға ықпалдасады.
Жастар орталығының басқа да атқаратын функциялары бар. 2024 жылы мемлекет басшысы қолдауымен мемлекеттік жастар саясаты заңына өзгерістер енгізілген болатын. Соның ішінде NЕЕT санатындағы жастар туралы ерекше айтылған. Яғни ұзақ уақыттан бері жұмыссыз жүрген, дағдарыс жағдайында қалып қойған жастар проблемасы бойынша жұмыс жасаймыз. Оларды кәсіпкерлікке тарту, оқуға түсіру, жұмыспен қамту мәселелерімен айналысамыз. Жастар арасында тараған проблемаларды еңсеруде іс-шаралар ұйымдастыру арқылы түсіндерме жұмыстарын жүргіземіз.
– Қазір түрлі орталық та, ұйым да көп. Жастар орталығына қоғамдық көзқарас қандай?
– Оныңыз рас. Көбі жастар орталығын волонтерлық ұйым көріп, тек сол бағытта ғана жұмыс істейді деп ойлайды. Біз волонтерлықпен де айналысамыз. Осы мақсатқа байланысты жұмыстар күшін үнемі ұйыстырып, ұйымдастырамыз. Дегенмен басқа да ауқымды шараларды жұмыс жоспары бойынша жүзеге асырамыз. Қоғамдық өзгерістерге байланысты жедел шараларды да қолға алып, заң шеңберінде жүргіземіз.
Атап өткендей, бізде басқа да көптеген жастарға арналған ұйымдар бар. Мәселен, ауданда екі бірдей жастар орталығы жұмыс істейді. Оның бірі біз болсақ, екіншісі, Қазалы қалалық жастар ресурстық орталығы. Жастардың жан-жақты жұмыс істеп, озық идеяларын жүзеге асыруға мүмкіндіктер қаралған. Үлкен ғимаратымыз бар. Бұл аудан басшылығының жастар саясатына деген оң көзқараста екенін көрсетеді десем артық емес.
– Заманның қожасы да, тұтқасы да сендер деп сенім артатын жас толқынның арасындағы басты мәселе қандай?
– Қазіргі қоғамның басты дертінің бірі деп Лудоманияны айтар едім. Ойынқұмарлық қанша тамырға балта шауып, қанша отбасын күйретті. Бұл әлем алаңдап отырған күрделі мәселе. Дүниежүзілік денсаулық сақтау мамандары оны қазіргі заманның психологиялық ауруы деп танып отыр. Біздің орталық осы мәселе, оның қаупі туралы түрлі жұмыстар жүргізіп келеді. «Қоғамды дұрыстағың келсе, қадамды өзіңнен баста» деген қағида бар. Біз, ең алдымен, орталықта жұмыс істейтін қызметкерлерге, есепшілерге түсіндірме жұмыстарын жүргіздік. Ондағы басты мақсат – заңсыз қаржы жымқыру мәселесінен алшақ ұстау. Ауданда аталмыш мәселе бойынша бірнеше жағдай орын алып, құрбаны болған мемлекеттік қызметкерлер мемлекет қаржысын заңсыз ойындарға құйып жіберген.
– Ресурстық орталығы қызметіне шамамен қанша жас жүгінеді? Қанша тұрғын қамтылған?
– Ресурстық орталықта күніне 70-80-ге дейінгі жас әртүрлі жұмыспен айналысады. Бір бөлігі өнер, шығармашылықпен айналысса, бір бөлігі өз бос уақыттарын орталыққа келіп өткізеді. Біз өздерін жан-жақты тануға мүмкіндік береміз. Аудан бойынша 23532-ге жуық жас бар. Қатарында басқа қалалардан келетін жастар да бар. Яғни біздің орталық 25 мыңға жуық жастарға бағыт-бағдар беріп, қызмет көрсетуге қауқарлы.
– Өнерге қызығушылықтары қандай деңгейде? Оларды шығармашылық жобаларға тарту үшін қандай шаралар жүргізуде?
–Жастар саясатының ауқымы өте үлкен. Жастардың өнерін өрістететін негізінен мәдениет, оқушылар үйі, өнерге қатысты театрлар. Осы шығармашылық істерді атқару үшін мемлекеттен қаржы бөлінеді.
Жастар орталығында кеңесшілер жұмыс істейді. Олар мемлекеттік бағдарламар бойынша жастарға кеңес береді. Шығармашылық бағыттағы дүниелердің барлығына іс-шаралар өткіземіз. Оларды шыңдау, кәсіби тұрғыда жұмыс істеуде бізде аудандағы шығармашылық клубтар, өнер мектебі, театрдағы арнайы профессионалды мамандар бағыт-бағдар береді. Одан әрі шыңдау үшін түрлі форматтағы іс-шаралар ұйымдастырамыз. Сол іс-шараларға қатысқан жастар өз шығармашылық бағыттарын таңдап, өздері әрі қарай белсеніп бастайды.
– Алдағы жоспарларыңызбен бөліссеңіз...
– Қазалы жастар ресурстық орталығы – аудан жастарына жан-жақты қолдау көрсететін маңызды ұйым. Жыл басынан бері атқарылған жұмыс ырғағы көңіл қуантады. Алда атқарар шаруалар ауқымды. Оны сөзден гөрі істеп көрсеткен жөн деп ойлаймын. Бүгінде 25 мыңға жуық жастың болашағына оң ықпал етіп отырған бұл орталықтың қызметі әлі де кеңейе түспек. Алдағы уақытта жастарға жаңа мүмкіндіктер ұсынып, олардың дамуына жол ашатын түрлі жобалар жүзеге асатынына сенімдіміз.
– Уақыт бөлгеңізге рахмет!
Сұхбаттасқан Айлуна ЖАҢАБЕРГЕНОВА
