Құқықбұзушылықтың алдын алу – басты міндет

Мәжіліске аудан әкімі Мейрамбек Зинабдинұлы, аудандық мәслихат депутаттары, үкіметтік емес ұйымдардың өкілдері, Әйтеке би кенті және ауылдық округ әкімдері, дербес бөлім басшылары мен мектеп директорлары, учаскелік полиция инспекторлары қатысты.

Күн тәртібінде – «Заң және тәртіп» қағидаты аясында 2025 жылдың 3 айында аудан көлемінде құқық бұзушылық профилактикасы бойынша атқарылған жұмыстардың тиімділігін, осы бағытта алдағы уақытта атқарылатын іс-шараларды талқылау мәселесі қаралды.

Мәжілісті аудан әкімі Мейрамбек Зинабдинұлы ашса, аудан прокуроры Дарын Елтайұлы жүргізді.

Мәселеге байланысты аудан прокурорының орынбасары Ғанибек Сағатов баяндама жасады. Бұдан соң аудандық білім бөлімінің басшысы Әділхан Жөлекешов пен аудандық полиция бөлімінің бастығы Асылбай Аңсатов есебі тыңдалды.

Ғанибек Сағатовтың мәліметінше, бірігіп атқарған жұмыстардың нәтижесінде осы жылдың өткен мерзімінде жалпы қылмыстылық 10 процентке төмендеген. Оның ішінде аса ауыр қылмыстар 100, ауыр санаттағы қылмыстар 12, орташа қылмыстар 38, ұрлық 25, алаяқтық 16 процентке төмендеген.

Қазіргі таңда кәмелетке толмағандар арасында құқық бұзушылықтың алдын алу – өзекті мәселелердің бірі екендігі жасырын емес. Осы ретте облыстық білім, денсаулық сақтау басқармасы және полиция департаментімен құқық бұзушылықтың алдын алудың барлық тетіктерін іске қосып, «2024-2025 жылдарға арналған құқықбұзушылық, буллинг, есірткі, лудомания, вейб темекі, интернетке тәуелділіктің алдын алуға бағытталған профилактикалық бірлескен іс-шаралардың қадамдық жұмыс жоспарын» әзірлеп, тиісті жұмыстар жүргізілуде. Осыған орай білім саласындағы құқықбұзушылықтың алдын алу мақсатында атқарылған жұмыстар және алдағы міндеттер туралы білім бөлімінің басшысы айтып берді.

Ол мемлекет білім беру ісін дамыту, ұстаздар, оқушылар мен түлектерге лайықты жағдай жасау, бала өмірі мен оның қауіпсіздігін сақтау мақсатында қолдан келгеннің бәрін жасап отырғандығын алға тартты.

– Кәмелетке толмағандардың беймезгіл уақытта көше кезуін тоқтату үшін аудан әкімдігі күшейтілген 15 рейдік топ құрып, тиісті жұмыс атқарылуда. Білім бөлімі тарапынан қосымша Әйтеке би кенті, қала мектептеріне өз мөлтек аудандары белгіленіп, күнделікті рейд жүргізу жөнінде нақты тапсырма берілген. Директорлардың тәрбие жұмысы жөніндегі орынбасарларына арнайы чат ашылып, есебі күнделікті бақыланып отыр.

Мектеп қабырғасында балаларға жаңа заманға сай лайықты тәрбие беру біздің басты міндетіміз. Барлық әріптестерімді мектеп пен ата-ананың өзара байланысын нығайтуға, балалар мен жасөспірімдер арасындағы құқық бұзушылықтың алдын алу шараларын жетілдіруге шақырамын, – деді Әділхан Жөлекешов.

Қазалы ауданы полиция бөлімінің бастығы полиция подполковнигі А.Ансатовтың сөзінше, аудан көлеміндегі криминогендік ахуал тұрақты. Атқарылған профилактикалық жұмыстардың нәтижесінде, былтыр 12 айда қылмыстылық деңгейі 3,1 процентке төмендеген.

Дегенмен пәтер ұрлығы, интернет алаяқтық, мас күйінде жасалған, бұрын сотты болғандармен жасалған, топпен жасалған, отбасы тұрмыстық қатынастар саласында жасалған қылмыстар өсім алған. Өткен жылы аудан көлемінде әкімшілік құқық бұзушылық жасаудың – 8532 дерегі анықталды. Оның ішінде 3775 құқық бұзушыға 76,8 миллион теңге көлемінде айыппұл салынып, 3250 тәртіпке бағынбағандардан 64,2 миллион теңге өндірілген.

Жол апаттылығына тікелей септігін тигізетін жол қозғалысы ережесін өрескел бұзушыларды анықтау бағытында «Қауіпсіз жол», «Автобус», «Мас жүргізуші қылмыскер» мен «Заңсыз қайта жабдықтау» және «Құқық тәртібі» арнайы жедел-профилактикалық іс-шаралары өткізілген.

Кәмелетке толмағандармен профилактикалық жұмыстар барысында, 179 құқық бұзушылық анықталса, қаңғыбастық пен кезбелікке салынған 2 жасөспірім бейімдеу орталығына орналастырылған. Оның ішінде түнгі уақытта заңды өкілсіз ойын-сауық және тұрғын жайдан тыс жүрген 141 жасөспірімнің ата-анасы әкімшілік жауапкершілікке тартылған.

– Жыл басынан мал ұрлығын жасаған топ құрықталды. Құжатсыз мал тасымалдау дерегімен 7 хаттама рәсімделіп, 231000 теңге айыппұл салынды. Малдарын қараусыз қалдырған 31 тұлғаға әкімшілік хатттама рәсімделіп, 342552 теңге көлемінде айыппұл өндірілді. Көтерілген әрбір мәселе өте маңызды, сол себепті, жергілікті тұрғындардың қауіпсіздігі үшін қолда бар күш-мүмкіндіктерді барынша пайдалана отырып, аянбай қызмет атқаратын боламыз, – дейді Асылбай Аңсатов.

Аудан әкімі Мейрамбек Зинабдинұлы шаһарда 77 бейне бақылау камера құрылғандығын еске салды. Бұл өз кезегінде ауданда қылмыс санын азайтуға септігін тигізуі тиістігін жеткізді.

Сонымен қатар көктем айлары келіп, күн жылуына орай, су жүретін арықтар мен каналдарды және балаларға арналған ойын алаңдарында сақтық шараларын күшейту жайы тілге тиек етілді.

Жиын барысында қаралған мәселелер бойынша жергілікті атқарушы және полиция органдарына профилактикалық жұмыстардың тиімділігін арттыру жөнінде хаттамалық шешіммен нақты тапсырмалар берілді.