Бақылау-кассалық машиналар түбіртегі мемлекеттік тілде болуы тиіс

Бұл туралы Маңғыстау облысы бойынша Мемлекеттік кірістер департаменті хабарлады, деп жазады inbusiness.kz сайты.Фото: dknews.kz

Маңғыстау облысы бойынша Мемлекеттік кірістер департаменті Қазақстан Республикасы Ғылым және жоғары білім министрлігінің Мемлекеттік кіріс органдарына мемлекеттік тілдің қолданылу аясын кеңейтуге қатысты өтінішіне сәйкес кәсіпкерлік субъектілерінің назарына келесі маңызды ақпаратты жеткізеді.

Министрлікке бақылау-кассалық машиналар (БКМ) арқылы жасалатын операциялар тіліне қатысты азаматтардан ауызша шағымдар жиі түсіп келеді. Бұл жағдай барлық сауда нүктелерінде, банктерде, әуежайларда және қоғамдық орындарда (асхана, кафе, мейрамхана, дәріхана, театр, кинотеатр және т.б.) БКМ арқылы берілетін түбіртектің тек орыс тілінде басылып шығатындығынан туындауда.

"Қазақстан Республикасындағы тіл туралы" Заңның 4-бабына сәйкес, мемлекеттік тіл – мемлекеттің бүкіл аумағында қоғамдық қатынастардың барлық салаларында қолданылатын тіл болып табылады. Сонымен қатар, заңның 6-бабында әрбір азамат ана тілін пайдалануға, қарым-қатынас, тәрбие, оқу және шығармашылық тілін еркін таңдауға құқылы екендігі көрсетілген. Бұл орайда азаматтар мемлекеттік тілде қызмет көрсетуді талап етуге құқылы.

"Салық және бюджетке төленетін басқа да міндетті төлемдер туралы" Қазақстан Республикасы Кодексінің 170-бабына сәйкес, бақылау-касса машиналарының модельдері Мемлекеттік тізілімге енгізіледі және осы тізілімге сәйкес мемлекеттік тілді техникалық талаптармен ауыстыру қарастырылған.

Мемлекеттік тізілімге енгізілген барлық БКМ модельдері техникалық талаптарға сәйкес келеді және мемлекеттік тілге аудару функциясын орындайды. Осыған байланысты, кәсіпкерлерден Қазақстан Республикасы заңнамасының талаптарына сәйкес қызмет көрсету барысында БКМ түбіртегін мемлекеттік тілде ұсынуды сұраймыз.