Алтынның бағасы рекордтық көрсеткішке жетті

Алтынның бағасы 3 100 доллардан асып, тағы да рекорд жаңартты. Бұл туралы Stan.kz ақпарат агенттігі Reuters басылымына сілтеме жасап хабарлайды.

Фото: Ru.freepik.com

Дүйсенбіден бастап алтын унциясына 3 106,50 доллардан сатылып жатыр.

АҚШ президенті Дональд Трамптың баж салығына қатысты мәлімдемесі мен оның экономикалық салдарына қатысты алаңдаушылық, сондай-ақ геосаяси тұрақсыздық алтын бағасының өсуіне алып келді. Жыл басынан бері алтынның бағасы 18%-дан аса өсті. Осы айдың басында оның құны алғаш рет унциясы 3 000 доллардан асты. Сарапшылар бұл өсімді экономикалық тұрақсыздыққа, геосаяси шиеленіске және инфляцияға қатысты күшейген алаңдаушылықпен байланыстырады.

Сонымен қатар алтын бағасының өсуі бірнеше банкті өз болжамдарын ұлғайтуға мәжбүрледі.

Осы айда Goldman Sachs, Bank of America және UBS алтын бағасына қатысты болжамдарын көтерді.

    Goldman Sachs жылдың соңына дейін алтынның унциясы 3 300 доллар деңгейіне жетеді деп санайды (бұрынғы болжам 3 100 доллар болған);

    Bank of America 2025 жылы алтынның бағасы 3 063 доллар, ал 2026 жылы 3 350 долларға жетеді деген болжам жасады. Бұл олардың алдыңғы 2 750 және 2 625 доллар деңгейіндегі бағаларынан жоғары.

Трамп қызметке кіріскен сәттен бастап американдық өнеркәсіпті қорғау және сауда тапшылығын азайту мақсатында жаңа тарифтер енгізу жоспарын ұсынды.

Басылымның мәліметінше, 2 сәуірде Трамп жауап ретінде жаңа тарифтер пакетін жариялайды деген болжам бар.

Бұған дейін Трамп ресейлік мұнайға қайталама баж салығын саламын деп сес көрсеткен еді.