Партиялық бақылау комиссиясының кезекті отырысы өтті

Бірінші мәселе аудандағы ет өнімдерінің қымбаттауына байланысты тұрақтандыру шаралары туралы болды. Бүгінде әлеуметтік желілерде жергілікті тұрғындар тарапынан ет өнімдерінің қымбаттауы өзекті тақырыпқа айналып отыр. Аудандық ауыл шаруашылығы мен жер қатынастары бөлімінің басшысы Еркін Сейтов ет бағасының қымбаттауы тек ауданда ғана емес, еліміз бойынша өзекті мәселелердің бірі екенін атап өтті.

Аудан көлемінде негізсіз баға өсіміне жол бермеу және делдалдық қызметтерді реттеу мақсатында арнайы жұмысшы топ мониторинг жұмыстарын тұрақты жүргізіп жатқанын жеткізді. Сонымен қатар бөлім басшысы «Дипломмен – ауылға» мемлекеттік бағдарламасының 2024 жылға орындалу барысы мен биылғы жылға жоспарлары туралы тоқталды.

Мұнан соң Мансап орталығының басшысы Болатбек Баймаханов 2024 жылы халықты жұмыспен қамту көрсеткіштері мен мемлекеттік бағдарламалардың орындалуы туралы баяндады. Есепті кезеңде жұмысқа орналастыру жоспары 4486 адамды құрап, 112,9 пайызға орындалған. Сондай-ақ 789 жаңа жұмыс орны құрылған. Биылғы жоспарлар өз деңгейінде орындалатынын атап өтті.

Күн тәртібіндегі соңғы мәселе партия атынан сайланған Майлыбас ауылдық округі әкімінің сайлауалды бағдарламасының орындалуы жайында болды. Ауылдық округ әкімі Алмат Әбілхан сайланған уақыттан бастап атқарған жұмыстарын баяндап, алдағы жоспарларымен бөлісті.

Өз кезегінде комиссия мүшелері ет өнімдерінің бағасын тұрақтандыру мақсатында жергілікті шаруашылықтармен тұрақты әріптестік орнату, жұмыспен қамтуда жастарды қолдау жобаларын іске асыру және ауылдағы денсаулық сақтау саласына қатысты ұсыныс-пікірлерін білдірді.