Қазақстанда депозиттер бойынша шекті мөлшерлеме жойылады
Фото: depositphotos.comНаурыздан бастап Қазақстанның депозиттерге кепілдік беру қоры шекті мөлшерлемелердің мәнін жариялауды тоқтатып, депозит нарығындағы нарық мөлшерлемелері туралы мәліметтерді жариялай бастайды, - деп хабарлайды Massaget.kz.
Бұл банктер нарықтағы жағдайға қарап, салымдар бойынша сыйақы деңгейін өзі анықтай алатынын білдіреді.
Бұған дейін ҚДКБҚ банктердің депозиттерді жаппай тартуына жол бермеу үшін ең жоғары мөлшерлемелерді шектеген болатын. Алайда банк секторы дамуына байланысты реттеуші қатаң бақылаудан бас тартуды ұйғарған. 2024 жылы көптеген банк үшін шекті мөлшерлеме алып тасталды. Енді шектеулер нарықтың барлық қатысушысы үшін алып тасталады.
"Келесі қадам: капиталдануы төмен банктер үшін теңгелік депозиттер бойынша шекті мөлшерлемелерді жою. 2025 жылғы 1 наурыздан бастап ҚДКБҚ теңгелік депозиттер бойынша шекті мөлшерлемелерді белгілемейді. Капиталдануы төмен банктер депозиттік саясатын басқа банктер секілді нарықтық жағдайға сай белгілейді. Сонымен бірге капиталдануы төмен банктер депозиттері бойынша мөлшерлемелерді айтарлықтай өсіретін болса (нарықтағы мөлшерлемеге қарағанда жоғары+спред), бұл банк жүйесіне қосымша салмақ болып тиеді. Осыған байланысты мұндай банктер мөлшерлемелер шектен тыс асырылу дәрежесіне және депозиттерді тарту көлеміне қарай көтеріңкі жарна төлейді", - деп жазылған хабарламада.
Жүргізілген реформа нәтижесінде депозиттер бойынша сыйақы мөлшерлемелерін белгілеу кезінде банктерге мейлінше еркіндік беріледі деп жоспарланып отыр.
"Бұл банктер арасында адал бәсекелестік дамуына жағдай жасайды және бөлшек саудалық депозит нарығының, әсіресе, санаулы банктер ғана қатысатын сегменттің дамуына жаңа серпін береді. Айталық, қазір мерзімі 12 айдан асатын мерзімді және жинақ салымдарды тарту көлемі мардымсыз, бірақ көбейтуге әлеует жеткілікті", - дейді ҚДКБҚ басшысы Әділ Өтембаев.
