Үйқамақтағы қазақстандықтардың 60 пайызына электронды білезік тағылды
Биыл елімізде қылмыстық істерді қарау 5,9 пайызға артқан. Бұл туралы Жоғарғы соттың қылмыстық істер жөніндегі сот алқасының төрағасы Назгүл Рахметуллина мәлім етті.
Фото: kabar.kgОсыған қарамастан, алқа басшысы сот төрелігін жүзеге асыру сапасының оңалғанын айтып отыр.
- 4,8% сот актілерінің апелляцияда күші жойылды және өзгертілді, ал кассацияда – 1%. Бас бостандығынан айрылғандардың саны 3,8%-ға көбейді, осы ретте айыппұл арқалаған және қоғамдық жұмысқа тартылғандардың да саны артты, - деді Назгүл Рахметуллина Жоғарғы соттың жылды қорытындылауға арналған кеңесте.
Сот алқасы төрағасының мәліметіне сүйенсек, сотпен қамауға алуды санкциялау туралы өтінішхаттар өткен жылға қарағанда азайған. (Былтыр 75,8%, биыл 74,5%).
- Биыл сот үйқамаққа алу тәсілін 5 есе, кепілдік алу 8 есе көп қолданды. Үйқамақтағы адамдардың 60%-на электронды білезік тағылды (2021 жылы бұл көрсеткіш 3%-дан аспаған). Сонымен қатар қылмыстық құқық және процестік мәселелері бойынша 12, әкімшілік құқық бұзушылық туралы заңнама бойынша 1 нормативтік қаулыға өзгерістер мен толықтырулар енгізілді, - дейді ол.
Бұған дейін Жоғарғы сот отырысында мемлекеттік органдар айналасындағы дау-дамайдың артқаны айтылған еді.
Айта кетейік, бүгін елордада 2024 жылғы сот төрелігін жүзеге асырудың қорытындысы бойынша Жоғарғы сот корпусының кеңейтілген кеңесі өтті.
