«Адал адам» мәдени-тәрбие орталығы жобасы Қызылорда облысының мәдениет үйлері мен клубтарында сәтті жүзеге асырылып, қоғамның рухани және мәдени өмірінде ерекше орын алуда. Осы орайда Лақалы ауылдық клубында жүзеге асырылып жатқан «Адал адам» жобасының жеті бағыты аясындағы іс-шаралар ауыл тұрғындарының мәдени және рухани дамуына елеулі үлес қосуда. Оның ішінде «Кино-TIME» бағыты бойынша, апта сайын ұйымдастырылатын тәрбиелік мәні бар кино көрсетілімдері аясында ұлттық фильмдер ұсынылып, ауыл жастары мен тұрғындары арасында рухани және патриоттық тәрбие беру жұмыстары жүргізілген. Аталған іс-шаралар отбасылық құндылықтарды, адалдық пен еңбексүйгіштікті насихаттауға бағытталыпты. Ал «Сұхбат TIME» бағыты – елге сыйлы тұлғалар, еңбек адамдарымен, үлгілі отбасылармен сұхбаттар ұйымдастырылды. Олардың өмір жолы мен тәжірибелері ауыл жастарына үлгі ретінде ұсынылған. Бұл кездесулер ауыл тұрғындарының қоғамдағы белсенділігін арттырып, жастарды рухани тәрбиеге бағыттауда маңызды рөл атқарды дейді мамандар. «Әлем-BOOK» бағыты аясында «Зейін» оқырмандар клубы құрылып, балаларға қызықты кітаптарды таныстыру, көркем әдебиет шығармаларын сахналау жұмыстары ұйымдастырылған. Бұл шаралар балалардың кітап оқуға деген қызығушылығын оятып, шығармашылық қабілеттерін дамытуға ықпал етті. «ART уақыт» бағыты бойынша, балалардың өнерге деген қызығушылығын арттыру мақсатында шығармашылық үйірмелер ұйымдастырылыпты. Ән, би, сурет салу, қолөнер және өнер байқаулары өткізілген. Игі бағыт ауыл балаларының эстетикалық талғамын қалыптастырып, өнер саласында жаңа дарындарды анықтауға мүмкіндік берді. «Креативті HUB» бағытымен ауылдың ерекшелігін ескере отырып, қолөнер шеберлерінің бұйымдарын жасау және балық аулауға қажетті ау құралдарын тоқу сияқты практикалық шеберлік сабақтары өткізілген. Жобаның негізгі бағыты тек мәдени даму ғана емес, сонымен қатар экономикалық тиімділікті де арттырды. Ауыл шеберлерінің қолынан шыққан бұйымдар мен ау құралдары тапсырыс­пен сатылып, жергілікті тұрғындардың табысын көбейтуге септігін тигізді.

«Жанұя шуағы» бағыты бойынша, ауылдық клубта қазақтың дәстүрлі мәдениетін насихаттау мақсатында «Жанұя шуағы» бұрышы ашылды. «Сәскелік шай» атты бағдарлама аясында көптеген кездесулер өткізілген. Аталмыш бағыт аясында ауылдық шаралардан бөлек, бір облыстық, үш аудандық деңгейдегі байқау өткізілді. Бұл өнегелі отбасылар мен ардақты аналардың қатысуымен өткізіліп, ұлттық салт-дәстүр мен отбасының рөлін дәріптеуге бағытталған. Ал «Еріктілер тобы» – ауылдың белсенді жастары мен тұрғындары еріктілер тобы арқылы түрлі әлеуметтік маңызы бар іс-шараларға қатысып, мұқтаж жандарға көмек көрсетті. Бұл бағыт ауылдың бірлігі мен қоғамдағы жауапкершілікті арттыруға ықпал етті. Жоба бойынша атқарылған жұмыстардың нәтижесі де көңіл қуантады.

Мамандардың айтуынша, тәрбие­лік мәні бар шаралардың жүйелі түрде өткізілуі – жастар арасында ұлттық құндылықтарға құрмет пен жауапкершілік сезімін арттырыпты. Қоғам белсенділерімен және шығармашылық тұлғалармен сұхбаттар – ауыл тұрғындарының танымын кеңейтті. Креативті әрі практикалық жобалардың іске асырылуы – ауыл экономикасы мен қолөнерін дамытуға үлес қосты. Ұлттық салт-дәстүрлерді жаңғырту шаралары – ауыл тұрғындарының рухани байланысын нығайтты. Барлық өткізілген шара өз уақытында әлеуметтік желіде жүйелі түрде жарияланып, көпшіліктің құрметіне бөленген.

Келер жылы да «Адал адам» жобасының ауқымы кеңейіп, жаңа тың бастамалар жүзеге асырылмақ. Олардың ішінде ұлттық мәдениет және өнер апталығы: балалар мен жасөспірімдер арасында шығармашылық байқаулар өткізу, эко-волонтерлік жобалар: ауыл аумағын көгалдандыру және тазалық акцияларын ұйымдастыру, мәдени экспедициялар: ауыл тарихын зерттеу және насихаттау, шеберлік сабақтарының көбейтілуі: қолөнер шеберліктерін дамыту және экономикалық белсенділікті арттыру, «Жанұя шуағы» бағыты бойынша жаңа форматтағы отбасылық байқаулар ұйымдастыру бар. «Кино-TIME» шараларын ауыл балаларының өздері түсірген шағын фильмдермен толықтыру қолға алынбақ. «Әлем BOOK» бағытында «Менің алғашқы кітабым»: Балалар мен жасөспірімдердің өз жазған шығармаларын таныстыру секілді бірқатар тың жоспар жасалған екен.

Иә, Лақалы ауылдық клубы жаңа жылды жаңа идеялар мен креативті шаралар арқылы ауылдың мәдениетін, рухани өмірін және экономикалық мүмкіндіктерін одан әрі дамытуға бағытталған жұмыстармен бастамақ. Ауылдық клуб мамандары жоба аясында қаншама жұмыстың атқарылуына үлесін қосқан ауыл адамдарына клуб ұжымы атынан зор алғысын білдіреді. Небәрі 2-3 қызметкерден тұратын шағын клуб үшін осыншама ауқымды жұмыстарды атқару керемет жұмыс. «Ауыл тұрғындарына мәдени және рухани қызмет көрсету – біздің басты міндетіміз деп санаймыз» дейді мамандар. Бұл – адал еңбектің, жауапкершілік пен өнерге деген шынайы жанашырлықтың айқын көрінісі емес пе?