Ел өзегі – мемлекеттік тіл
Аудан әкімдігінде облыстық қоғамдық даму басқармасының ұйымдастыруымен «Мемлекеттік тіл саясатының негізгі бағыттары мен көрнекі ақпарат мәселелері» атты облыстық семинар өтті.Алқалы жиынға құқық қорғау және салық органдарының өкілдері, облыстық кәсіпкерлік және туризм, құрылыс, сәулет және қала құрылысы басқармаларының қызметкерлері, Қызылорда қаласы мен аудан әкімдері орынбасарларының, Қызылорда қалалық, аудандық мәдениет және тілдерді дамыту бөлімдерінің басшылары мен тіл мамандары, кәсіпкерлер палатасының директоры, жарнама агенттіктерінің басшылары, өкілдері, «Халықаралық «Қазақ тілі» қоғамы» ҚБ облыстық филиалының төрағасы, филолог-ғалымдар, тіл жанашырлары қатысты.
Арнайы лед экран арқылы онлайн өткен семинарда «Өңірде мемлекеттік тіл саясатының іске асырылуы және көрнекі ақпарат мәселелері», «Мемлекеттік тілдің көрнекі ақпарат пен жарнама саласындағы қызметі», «Сырдария ауданындағы көрнекі ақпарат саласы бойынша атқарылған жұмыстар туралы», «Бақылау-касса машиналарының мемлекеттік тілде жүргізілуін қамтамасыз ету бағытындағы жұмыстар туралы» тақырыптарда хабарламалар тыңдалды.
Басқарма басшысы Руслан Каюпов жыл көлемінде ұйымдастырылған республикалық байқауда жүлделі орын иеленген Қазалы ауданындағы «Айерке» фотосалонының копирайтері Жансая Пірім мен Қазалы ауданындағы №95 орта мектептің бастауыш сынып мұғалімі Наталия Барковаға басқарманың Алғысхатын табыстады. Республикалық байқау жүлдегерлер жетекшісі Қазалы ауданының мәдениет және тілдерді дамыту бөлімінің бас маманы Раиса Батырханқызы Тасыбаева.
Жиын соңында қатысушылар ұсыныс-пікірлерін ортаға салды. Олар кәсіпкерлердің жарнама мәтіндерін алдын ала жергілікті әкімдіктермен келісу тәжірибесін қайта қолға алу жұмыстарын жандандыруды ұсынды.
Айнұр ЖИЫЛЫСҚЫЗЫ
