Ү. Түктібаев ауылының тұрғындарына АЭС салудың маңызы туралы айтылды
Бүгін АЭС салуды қолдау жөніндегі Қазалы аудандық халықтық штабының жұмыс жоспары аясында Алға ауылдық округінің орталығы Ү.Түктібаев ауылында тұрғындармен кездесу өтті. Оған аудандық Халықтық штаб төрағасының орынбасары Талайлы Бөріқұлақов пен штаб мүшесі Нұрғиса Жалғасбаев қатысты.
«2023 жылы еліміз Ресейден шамамен 100 млрд теңгеге энергия импорттағанын айта кеткен жөн. Белгіленген жоспардан тыс сатып алу кезінде оның құны екі есеге артады. Оның қымбаттығына байланысты тұтынушылар, яғни бізге тұрғындарға кері әсері тиеді. Ал АЭС энергия импортына тәуелділікті азайта отырып, бүкіл елді тұрақты және сенімді энергиямен қамтамасыз етуге мүмкіндік жасайды», - деді штаб мүшесі Нұрғиса Жалғасбаев.
Штаб төрағасының орынбасары Талайлы Бөріқұлақовтың айтуынша, елімізде атом электр станциясын салу үшін барлық жағдай жасалған. Уранның бай қоры, оны өңдеу мен өндіру үшін дамыған инфрақұрылым, сондай-ақ қуатты ғылыми база бар.
Кездесу соңында ауыл тұрғындары АЭС салуды қолдау бойынша оң пікірлерін айтып, қолдауға ниетті екендіктерін білдірді.
