Алдымен Әйтеке би кентіндегі жеке кәсіпкер Ырысты Бақдаулет Шәмілдің жиһаз және пластик есік-терезе өндіру цехының жұмысымен танысты. Кәсіп­кер «Іскер» бағдарламасы арқылы 4 миллион теңге және «Бизнестің жол картасы – 2025» бағдарламасы арқылы мемлекет тарапынан 15,5 миллион теңге қаржы алып, кәсібін жүргізіп келеді. Бүгінде өндіріс орнында 4 адам тұрақты жұмыспен қамтылып отыр.

Одан соң Мәжіліс депутаттары «Ауыл аманаты» жобасы аясында 6,509 миллион теңге қаржы алып, өз кәсібін жүргізіп отырған Толқын Бижанованың «Tolkin tattileri» кон­дитерлік цехының жұмысын көрді. Қазір цехта 4 адам жұмыс істейді. Мұнда ұннан жасалған түрлі тәттілер жасалып, аудан тұрғындарына тиімді бағада ұсынылуда.

Мәжіліс депутаттары жұмыс сапары аясында аудан жастарымен де кездесіп, олардың ұсыныс-пікірлерін тыңдады. Аудандық білім бөлімінің ғимаратында өткен кездесуде депутаттар Парламент қабырғасында қабылданып жатқан заң жобаларына, оның ішінде ойын бизнесі, лотерея қызметі және лудоманияға қатысты заңдардың мән-маңызына тоқталып, жастарды толғандырған түрлі сауал­дарға жауап берді.

Одан соң Әйтеке би кентіндегі «Жеңіс» саябағына барып, орталық саябаққа жүргізілетін абаттандыру жұмыстарының жобасымен танысты. Бұл жөнінде аудан әкімі депутаттарға саябақ ішіндегі ойын және спорт алаңдары, бассейін және басқа да тұрғындардың бос уақыттарын тиімді өткізу бағытында салынатын түрлі нысандардың жобаларын арнайы әзірленген эскиз арқылы таныс­тырып өтті.

Айта кеткен жөн болар, Мәжіліс депутаттары жұмыс сапары барысында Майлыбай елді мекеніндегі жеке кәсіпкер Есет Серімовтің түйе шаруашылығындағы жұмысын көріп, шаруашылық иесімен тілдесіп қайтты.