Қазақстанда республикалық орфографиялық комиссия құрылады
Сурет: Zakon.kzТіл саясаты комитеті "Қазақстан Республикасы Ғылым және жоғары білім министрлігінің кейбір мәселелері туралы" Үкімет қаулысының жобасын дайындады, деп хабарлайды Zakon.kz.
ҚР Ғылым және жоғары білім министрлігі туралы ереже мынадай мазмұндағы тармақшамен толықтырылады:
"Республикалық орфография комиссиясын құру және оның қызметін қамтамасыз ету".
Комитет қазіргі кезеңде қазақ тілінің орфографиясын жүйелеу аса маңызды мәселе болып табылатындығын айтты. Осыған байланысты ғылыми негізделген нұсқада қазақ тілінің емлесін әзірлеу және бекіту үшін арнайы орфография комиссиясын құру қажет.
"Бұл міндет ҚР Үкіметінің 2023 жылғы 16 қазандағы қаулысымен бекітілген ҚР-да тіл саясатын дамытудың 2023-2029 жылдарға арналған тұжырымдамасының 3-бөлімінде көзделген", - делінген негіздемеде.
Бұдан басқа, бұған дейін Премьер-Министрдің орынбасары ҚР Үкіметі жанындағы Мемлекеттік тіл саясатын іске асыру жөніндегі комиссияның отырысында министрлікке мүдделі мемлекеттік органдардың өкілдері мен ғалымдарды тарта отырып, орфографиялық комиссия құру туралы тапсырма берген болатын.
Құжат 23 шілдеге дейін жария талқылау үшін Ашық НҚА сайтында орналастырылған.
