Неге екеніне тоқталайын. Қазіргі таңда мектеп қабырғасында білім алып жүрген балақайлар – еліміздің ертеңі, келешегі дейміз. Ал келешекте мемлекетіміздің шаңырағы шайқалмас үшін оқушылар сапалы білім алуы керек. Ұстаздарымыз өзінің саласына байланысты оқушыларға күнделікті айтып жүрген ақпарат-білімін тест арқылы дәлелдеуден тартынбасы анық.

Бұрын білікті ұстаздар жалақының мардымсыздығынан бос уақытында балаларды ақылы оқытатын болса, бүгін жағдай түзелді. Десек те, репетиторға баратын балалар аз емес. Бұған кейбір мұғалімдер алдындағы балаға толыққанды білім бере алмай отырғаны себеп болуы мүмкін екенін жасыра алмаймыз. Сондықтан ұстаздардан өзін-өзі жетілдіруін талап ететін тәртіп аталған мәселенің түйінін тарқатады деп ойлаймын.

Ал директор орынбасарларының тест тапсыруы заман талабынан басқа ештеңе емес. Білім қызметкерлері жақсы біледі, ата-аналар, тіпті оқушылар тарапынан арыз-шағым жиілеп кететін сәттер болады. Заң талаптарын білмегеннің салдарынан ұстаздардың мәртебесі талай рет текке төгілді. Алайда өзі жауапты саланың тамырына қан жүгіртіп отырған мамандарымыздың құқықтық тұрғыда сауатын дәлелдеуі өзіне, әрі-беріден кейін әріптестерінің құқығы тапталмауына демеу болары даусыз.

Қадірлі ұстаздар қауымы! Аталған өзгеріс бізден білікті, өз ісінің маманы болуды, балаларды қалай тәрбиелеп жатқанымызды дәлелдеуді ғана сұрап отырғанына зер салайық. Балаға білім беру үшін өзіміздің біліміміз биік, толыққанды болуы маңызды.