Рейдтік профилактикалық жұмыстар жүргізілуде
Аудан көлемінде кәмелетке толмағандар арасындағы қылмыс пен құқық бұзушылықты анықтау, алдын-алу, сондай-ақ, балалардың қадағалаусыз және панасыз қалуының алдын-алу, құқықтық сауаттылықты арттыру бойынша «Қауіпсіз қоғам» рейдтік профилактикалық жұмыстары жүргізілуде.
Рейд барысында компьютерлік орталық тар мен ойын–сауық орындары, саябақтар мен спорт алаңдары қамтылды.
Түнгі рейд шарасына аудандық полиция бөлімі жергілікті полиция қызметі бөлімшесінің ювеналды полиция тобының аға инспекторы, полиция майоры Махаббат Бегалиева, «AMANAT» партиясы аудандық филиалының консультанты Ернұр Кама, «Жастар Рухы» ЖҚ-ның белсенділері және аудандық Жастар ресуртық орталығының қызметкерлері қатысты.
Рейд жұмыстары кезінде кәмелетке толмаған жасөспірімдерге түнгі мезгілде қоғамдық орындар мен көшелерде ата-анасыз немесе заңды өкілсіз шектеулі уақытта жүруге тыйым салынатындығы жөнінде түсіндірме жұмыстары жүргізілді.
Іс-шараның қорытындысы бойынша кәмелетке толмағандардың заңды өкілдерінің еріп жүруінсіз ойын-сауық мекемесінде немесе тұрғын жайдан тыс жерде болуының бірнеше дерегі анықталып, 442-бап бойынша әкімшілік хаттамалар рәсімделді.
Айта кетейік, бүгінде профилактикалық жұмыстар жастар көп шоғырланатын орындарда және мейрамханаларда жүргізіліп, кәмелетке толмаған жасөспірімдердің түнгі 22:00-ден кейін заңды өкілдерінсіз көшеде жүрмеуі қадағалануда. Осы орайда ата-аналардан балалардың қауіпсіздігін қамтамасыз етуде түнгі беймезгіл уақыттары көшеде жүрмеуін қатаң бақылауда ұстауды сұраймыз. Бірлескен бұл жұмыстар алдағы уақытта тұрақты түрде жалғасатын болады.
