Алыс-жақын ауылдарды аралап жүргенде кезіккен ауылдарды бір-бірімен салыстырып жүретінім бар. Тұрғындардың тіршілігі мен ахуалын бақылап, түртіп қоямыз. Бүгінгі аудан әкімі Мұхтар Оразбаевтың тұрғындармен кездесуінің соңғы аялдамасы Алға ауылдық округі болды. Сол тұста ауданнан 75 шақырым қашықтықта орналасқан ауылдың жайынан хабар алдық.

Округте 2000-ға жуық тұрғын күн кешеді. Мұндағылардың басым бөлігі егін мен мал шаруашылығымен айналысады. Міне, осы тұрғындар былтыр балабақша қажет екенін айтқан. Аудан басшысының айтуынша, бұл үшін ұсыныс беріліп, қазір кезекте тұр.

Өткен жылы тағы бір қозғалған мәселе - елді мекен ішілік жолдың жөндеуден өтуі. Мұны да назардан тыс қалдырмаған жауаптылар ауыл ішіндегі айналма жолдың 12 шақырымына республикалық бюджеттен қаржы қарап, орташа жөндеу жұмыстары жүрген.

Ал бүгінгі кездесуде округ тұрғындары су ұңғымасы туралы қозғады. Олар сважинаның қаржысы шешімін тапса дейді. Бұдан бөлек, көгілдір отынның жайынан хабар сұрады. Аудан әкімінің айтуынша, сәтін салса газ игілігін көретін күн Алға жұртына да жетеді.