Қазалы Қазалы аудандық қоғамдық-саяси газет
» » Абылайхан – Азия чемпионы

Абылайхан – Азия чемпионы

Моңғолия Республикасының астанасы Ұлан-Батор қаласында 11-13 мамыр күндері самбодан Азия чемпионаты өткен болатын. Құрлықтағы басты бәсекелердің бірі саналатын дүбірлі додада қазалылық Абылайхан Жұбаназар да бақ сынады.
74 келі салмақта ел намысын қорғаған жерлесіміз алғашқы екі кездесудегі қарсыластарын жеңіп, ақтық сынға жолдама алды. Финалда Абылайхан қырғызстандық балуанды аз ғана уақыттың ішінде ұтып, жастар арасында самбодан Азия чемпионы атанды. Осылайша ол самбо күресінен Қазалы ауданынан шыққан тұңғыш Азия чемпионы болып отыр.
Бүгін Азия біріншілігінде топ жарған Абылайханды жерлестеріміз Әйтеке би кентіндегі теміржол вокзалынан күтіп алып, жеңісімен құттықтады. Әсіресе, Абылайхан оқитын Қазалы аграрлы-техникалық колледжінің оқытушылары мен студенттерінің қуанышында шек жоқ. Олар "Абылайхан, жарайсың", "Абылайхан – Азия чемпионы", "Колледж мақтанышы" деген жазулар жазылған плакаттарды ұстап шығып, гүл шоқтарын табыс етті. Сондай-ақ, Азия чемпионының туған-туыстары мен аудандық спорт саласының мамандары да Абылайханның қуанышына ортақтасып, ізгі тілектерін білдірді.
Айта кетейік, 2000 жылы Қазалы қаласында дүниеге келген Абылайхан Жұбаназар жасөспірімдер арасындағы қазақша күрес, самбо және дзюдодан Қазақстан чемпионы. Елімізде алғаш рет ұйымдастырылған "Жас барыс" турнирін ұтқан балуан. Жақында Қызылорда қаласында жастар арасында өткен самбодан ел біріншілігінің жеңімпазы атанып, спорт шебері атағына ие болды. 4 сыныптан бері №18 Қазалы аудандық балалар-жасөспірімдер спорт мектебінде жаттығып, осындағы Мұхтар Күзентаевтан тәлім алады. Азияда алтын алған Абылайхан тамыз айында Грузия елінде өтетін самбодан әлем біріншілігіне қатысады.
Жеңісбек АЙЫМҚҰЛОВ
16 мамыр 2018 ж. 191 0

Жаңалықтар мұрағаты

«    Тамыз 2018    »
ДсСсСрБсЖмСбЖс
 12345
6789101112
13141516171819
20212223242526
2728293031