Қазақстан президенті Қасым-Жомарт Тоқаев бүгін, 11 қаңтарда жаңа премьердің кандидатурасын ұсынады.

Сондай-ақ Тоқаев саяси және әлеуметтік-экономикалық салалардағы өзекті мәселелерді шешу бойынша ауқымды баяндама жасайды.

Президенттің қатысуымен өтетін жиынды "Хабар 24" телеарнасы тікелей эфирде көрсетеді.

Еске салсақ, 5 қаңтар күні мемлекет басшысы Қасым-Жомарт Тоқаев үкіметті отставкаға жіберді.

Қазір премьер-министр міндетін уақытша Әлихан Смайылов атқарып жүр.

2 қаңтарда Маңғыстау облысының тұрғындары наразылыққа шықты. Оған автокөлікке құятын газдың құны литріне 120 теңгеге дейін өскені себеп болған. Наразылық білдірушілер бағаны 50 теңгеге дейін төмендетуді талап етті. Арнайы құрылған үкіметтік комиссия белсенділермен келіссөз жүргізіп, бұл талап орындалатынын мәлімдеді.

Артынша басқа қалалардың халқы да наразылық шеруіне шыға бастады.

Ал Алматыда наразылық соңы лаңкестік әрекетке ұласты. Көшеге шыққандар полиция көліктерін қиратып, әкімшілік ғимараттарды өртеп жіберді. Алматы полиция департаментінің ғимаратына шабуыл жасады. Президент Қасым-Жомарт Тоқаевтың айтуынша, Алматы қаласы мен 9 облыс орталығы бандиттердің қолында болған. Содырлар тіпті, Ақорданы да басып алуды жоспарлаған. Алайда елордағаа үш әскери-көлік ұшағының келгенін естіп, бұл жоспарынан бас тартқан.

Осы оқиғалардан кейін президент ҰҚШҰ-дан көмек сұрады. Осылайша Қазақстанға 2 мыңнан аса ҰҚШҰ күштері мен 250 техника кіргізілді. Олар стратегиялық маңызды объектілерді күзетеді. Ал антитеррористік операцияны қазақстандық күш құрылымдары қызметкерлері жүргізіп жатыр.

Қазақстанда 19 қаңтарға дейін төтенше жағдай режимі жарияланды.