Баспаналы болу бақыты бұйырды

Баспананың кілтін аудан әкімі Мұхтар Оразбаев табыстап, кір машинасы мен шаңсорғыш сыйлады. Мұнан соң осынау шараның ұйытқысы болып жүрген Жастар ресурстық орталығының директоры Асылхан Дәрібаев пен «Қарекет» қайырымдылық қорының Қазалы ауданы бойынша еріктілерінің жетекшісі Айдос Таңбышовқа ризашылығын айтты.
Игі бастаманың арқасында баспанаға қол жеткізген Жанкент ауылының тұрғыны Қарлыға Матованың қуанышында шек жоқ. Ақ жаулықты апаның қолында мүмкіндігі шектеулі ұлы мен келіні, немересі тұрады. Аудан орталығынан кең әрі жайлы баспанаға ие болған отбасының ризашылығы мен қуанышын бөлісуге аудан әкімі Мұхтар Оразбаев, аудандық мәслихат хатшысы Бақытжан Жарылқап және «Nur Otan» партиясы аудандық филиалы төрағасының бірінші орынбасары Нұрғиса Жалғасбаев арнайы барып қайтты. Осы орайда аудан басшысы еріктілердің бастамасына сәттілік тілеп, алғысын айтты.
Бәріміз білетіндей, «Қарекет» қайырымдылық қорының басты мақсаты – мұқтаж жандарға, жетім-жесірлерге, мүмкіндігі шектеулі адамдарға, көпбалалы, жалғызбасты аналарға баспана сыйлау. Осыған дейін аудан бойынша қордың қолдауымен 8 тұрғын баспаналы.
Арай ЖҮСІП