Олжалы Олжас

Грек-рим күресінен спорт шебері Олжас Сырлыбай Италиядағы Рим қаласында Олимпиада алдындағы іріктеу жарысында үшінші орынды қанжығасына байлады. Оның сайысқа түскен 97 салмақтағы 15 адам арасынан суырылып шығуының өзі аудан үшін зор мақтаныш. Онда қарсыласы түрік палуанын жекпе-жекте тізе бүктірді.

№17 Қазалы ауданының олимпиадалық резервтің мамандандырылған балалар-жасөспірімдер мектебінің тәрбиеленушісі Олжас Мейрамбекұлы спортқа 12 жасында бет бұрды. Ол мектеп қабырғасында белсенді әрі сабақ үлгірімі де жақсы болған. Бұған дейін Моңғолияның Улан-Батор қаласында Азия чемпионы атанды. Қазақстан және халықаралық турнирлерде бірнеше дүркін чемпионы болып, жүлделі орындарды иемденді.

Сапарбек Көбегеновтің айтуынша, осы кезге дейін жиырмадан аса чемпионды тәрбиелеп шыққан.

– Бүгінде Олжасты ұлым Қанат екеуміз жаттықтыру үстіндеміз. Өмірлік тәжірибемдегі қажетті әдіс-тәсілдерді үйретіп жүрміз. Уақытылы тынбай күш-қуатты арттыратын жаттығуларды жасаймыз. Тәрбиеленушім қажетті дәрумендерді қабылдап, ағзаның тынық болуы қадағалануда, – дейді жаттықтырушы.

Қазір Қазақстан құрамасының толық мүшесі. Онымен қатар, жерлестерден: Бағдат Үсенов пен Еламан Аюп та өнер көрсетуде. Қазалылық палуан Олжастың арман-мақсаты жетерлік. Дегенмен ең бастысы, әлемдік додада жеңімпаз атанып, ел байрағын желбірету.

Айта кеткен жөн, бұйырса осы жылдың 7 сәуірінен бастап Алматыда ұйымдастырылатын Азия чемпионаты Олимпиадаға іріктеу жарысына қатыспақ. Жаттықтырушы Сапарбек Көбегеновтың айтуынша, лицензиясы дұрыс болса, Олимпиадада бақ сынамақ.