Сырдария өзенінің жағасында орналасқан Абай ауылының тұрғындарын толғандыратын мәселелердің бірі дәрігерлік амбулаторияның қысқаруы мен ауыл маңындағы «Ақсай» арнасына тоспа салу болатын.

Аймақ басшысы абайлық ағайындарға ауылдық дәрігерлік амбулатория жабылмайтынын, тек халық санының жетіспеуіне байланысты фельдшерлік-акушерлік пункт болып өзгеретінін түсіндірді. Атауы өзгергенімен халыққа бұрынғыша дәрігерлік көмек көрсетілетін болады. Ал, «Ақсай» арнасына тоспа салу үшін Қазалы ауданының әкімдігі тиісті жұмыстар жасап жатқанын жеткізді. Алдымен бұл жерлердің иесі бар-жоғы анықталып, ауданның коммуналдық меншігіне алынады. Мұнан соң тиісті басқармаға тоспа салу үшін ұсыныс беріледі.