Жаңақорғанда бокстан жасөспірімдер арасында Қазақстан чемпионаты басталады

20-23 мамыр аралығында Жаңақорған ауданында бокстан 2004-2005 жылдары туылған кіші жасөспірімдер арасында Қазақстан Республикасының чемпионаты өтеді. Жарысқа Астана, Алматы қалаларынан және еліміздің барлық облыстарынан 16 команда 160 спортшы 20 салмақта шеберлік байқасады.

Чемпионат қорытындысы бойынша үздіктер республикалық құрама қатарына іріктелетін болады.

Жарысты ұйымдастырушылар: ҚР Спорт және дене шынықтыру істері комитеті, Қызылорда облысының дене шынықтыру және спорт басқармасы, Жаңақорған ауданының әкімдігі, облыстық бокс федерациясы.

20 мамыр күні дене шынықтыру-сауықтыру кешенінде сағат 14.00-де жарыстың салтанатты ашылуы өтеді, 14.30-да жарыс басталады.

Жеңімпаздар мен жүлдегерлердің есімдері 23 мамыр күні белгілі болады. Жарыста қарағандылық Қуаныш Қауашев бас төрешілік қызметін атқарады.