Футзалдан аудан біріншілігі басталды
Өткен аптада Қазалыда футзалдан бесінші аудан біріншілігі басталып, бірінші тур ойыны өтті.Турнирдің ашылу салтанатына аудан әкімінің орынбасары Әлімжан Жарылқағанов қатысып, спортшыларға сәттілік тіледі.
– Қазалы футболының жетістіктері де жыл санап артып, қарқынды дамып келеді. Ауданымыздың аяқдоп шеберлері облыстық, республикалық, тіпті халықаралық деңгейде өнер көрсетіп, абырой биігінен көрінуде. Аудан жігіттерінен құралған «Жігер» футбол командасы жыл сайын облыс чемпионатында, ауыл спортшыларының «Алтын күз» ойындарында жеңімпаз атанып келсе, бұрымдылар да жаман нәтиже көрсетіп жүрген жоқ. Қазіргі таңда қазалылық Құндыз Қожахмет футболдан Қазақстан ұлттық құрамасының сапында ел намысын әлемдік аренада қорғап жүр.
Ауданда футболға деген қызығушылық жоғары деңгейде. Оны аудан біріншілігіне қатысушы командалардың санынан-ақ байқауға болады, – деді ол.
Айта кетейік, футзалдан бесінші аудан біріншілігіне «Арзан», «Көркем Сервис», «Орда», «Басықара», «Құмжиек», «Авангард», «Қайсар», «Сыр маржаны», «Жанқожа», «Намыс», «Қыран» және «Ақтілек» командалары қатысуда.
Қазалы ауданы әкімінің баспасөз қызметі
