Бұл туралы Қызылорда облысы бойынша экономикалық қылмысқа және сыбайлас жем­қорлыққа қарсы күрес депар­таментінде өткен онлайн брифингте айтылды.

Басқосуда агенттіктің аппарат басшысы Саян Ахметжанов бонусты есептеу әдістемесін түсіндірді. Аппарат басшысының айтуынша, бұл төлем қыз­мет­керлердің әлеуметтік жағдайын жақсартуға, сонымен қатар міндетін адал атқаруға сеп. Ол үшін ҚР Ұлттық экономика министрлігі арнайы қаражат көлемін бекіткен.

– Агенттік пен оның аумақ­тық департаменттеріндегі әкім­шілік мемлекеттік қызмет­кер­лерге бонус мемлекеттік орган­ның бонустық қоры анық­талған соң төленеді. Ал, құры­лымдық бөлімшелердің бо­нустық қоры басшының жеке жұмыс жоспарының орындалуын бағалауға байланысты беріледі. Егер бөлімше басшысы қызметкерді бағалау қажет деп тапса, қызметкерлерге сыйақы тағайындалады, – деді Саян Ахметжанов.

Жиында агенттік төрағасы Айгүл Шаимова қазір мереке қарсаңында мемлекеттік қыз­меткерлерге берілетін сыйақы­лар­дан бас тартылғанын да айтты.

– Біз мерекелерге арналған сыйақылардан бас тарттық және қызметкерлерді ынталандыру мақсатында тек бонустарды пайдаланамыз. Ол жылына бір рет төленеді және бұл жұмыста айтарлықтай нәтижеге қол жеткізген қызметкерлерге беріледі, –  деді Айгүл Шаимова.

Қосымша мәлімет ретінде айта кетейік, кез келген мемлекеттік қызметкердің бонусын арнайы құрылған комиссия анықтайды. Бонусты есептеудің арнайы формуласына сәйкес, бағаланған процент мөлшері қызметкердің нақты атқарған жұмыс күндерінің санына көбейтіледі. Агенттікте орта есеппен алғанда әкімшілік қызметкерлерге жалпы сомасы 1,5 млн теңге мөлшерінде бонус төленген екен. Мәселен, агенттіктің Қызылорда облысы бойынша департаментінің бас маманы Нұралы Бақытжан өткен жылы жүргізілген бағалау нәтижесінің қорытындысымен 5 жалақы көлемінде бонусқа қол жеткізгенін айтады. Бұдан бө­лек, департаменттің бас маманы Бағдат Әбдіқадыров та нәти­желі қызметі үшін жыл қоры­тын­дысында жоғары бағаға ие болып, соған сай үстемеақы алған.

Мөлдір ҚАЛЫМБЕТ.