Қазіргі таңда Ұлт көшбасшысының салиқалы саясатының арқасында еліміздің денсаулық сақтау саласы жүйелі түрде дамып келеді. Қазақстанның түкпір-түкпірінде озық технологиялармен жабдықталған жаңа медициналық мекемелер ашылуда. Соның айғағы жақында Қазалы ауданының орталығы Әйтеке би кентінде 150 орындық орталық аудандық аурухана пайдалануға берілді. Қызылорда облысының әкімі Қырымбек Көшербаев жаңа емдеу мекемесінің ашылу салтанатына қатысып, жедел жәрдем көлігінің кілтін табыстады. Сондай-ақ, аурухана үшін ангиограф медициналық қондырғысы мемлекеттік-жекеменшік әріптестік аясында алынды. Бұл қондырғы жедел және сапалы ота жасауға септігін тигізіп, Қазалы, Қармақшы, Арал аудандары мен Байқоңыр қаласының тұрғындарына қызмет көрсететін болады. Бұдан бөлек, биыл осы аурухана жанынан 250 орындық емхана салу көзделіп отыр. Міне, бұл жаңалықтар Қазалы ауданы тұрғындары үшін зор қуаныш.

Жақсылықпен басталған жыл басында Елбасымыз Н.Ә.Назарбаев Қазақстан халқына арнаған Жолдауында үздік денсаулық сақтау ісі және дені сау ұлт қалыптастыру мақсатында «Халық денсаулығы және денсаулық сақтау жүйесі туралы» кодекстің жаңа редакциясын әзірлеуді тапсырды. Жолдауда жарияланған он бағыттың ішінде салауатты өмір салтын ұстану үшін денсаулық сақтау ісі әрбір азаматқа қымбатқа түсетін стационарлық емге емес, негізінен аурудың алдын алуға бағытталуға тиістігін, қоғамдық денсаулықты басқару ісін күшейту, жастардың репродуктивті денсаулығын қорғауға ерекше назар аудары қажеттігі айтылған.

Елбасы қазіргі таңда медициналық технологияның жедел дамуына және халықтың өмір сүру жасының ұзақтығына байланысты медициналық қызметке сұраныс артып, медицина диспансерлік ем қолданудан амбулаторлық емдеу арқылы басқаруға көшу қажеттігін жеткізді. Бұл тәжірибе бұрыннан әлем елдерінде қолданылып келе жатқандығын, сондықтан оны батыл әрі белсенді түрде енгізу керектігін, сондай-ақ, Мемлекет басшысы денсаулық сақтау саласы халықтың, мемлекеттің және жұмыс берушінің ортақ жауапкершілігіне негізделген міндетті әлеуметтік медициналық сақтандыру жүйесіне кезең-кезеңімен көшетінін атап өтті. Бұдан бөлек, ақпараттық жүйелерді біріктіру, мобильдік цифрлық қосымшаларды қолдану, электрондық денсаулық паспортын енгізу, «қағаз қолданбайтын ауруханаға» көшу арқылы медициналық көмектің қолжетімділігі мен тиімділігін арттыру қажеттігі де айтылған.

Жолдаудан туындайтын негізгі бағыттар бойынша жүзеге асырылатын жұмыстарды сапалы орындау – баршамыздың міндетіміз деп білемін. Сондықтан барлық күш-жігерімізді біріктіретін кез келді, ағайындар!

амбулаториялық-емханалық қызметі бар Қазалы аудандық орталық

ауруханасының бас дәрігері.