Еліміздің үздік полицейлері анықталады
Астанада «Өз кәсібінің үздігі» атты ішкі істер органдарының үздік қызметкерлерін анықтайтын республикалық байқау басталды, - деп хабарлайды ҚазАқпарат тілшісі.Іс-әрекет тиімділігін арттыру мақсатын көздеген аталған байқау осымен елімізде үшінші рет ұйымдастырылып отыр. Үстіміздегі жылдың бірінші жартыжылдығында аймақтық байқауда үздік деп танылған 17 жол-патруль қызметкері өзара бақ сынайды. «Қоғамдық тәртіпті сақтау және жол қозғалысы қауіпсіздігін қамтамасыз ету - ішкі істер органдары іс-әрекетінің маңызды бағыттарының бірі. Осы міндеттерді атқару жоль-патруль полициясы саптық бөліністерінің күштеріне жүктелген. «Өз кәсібінің үздігі» байқауы ҚР Ішкі істер министрінің 2015 жылғы 9 маусымдағы №515 бұйрығын орындау үшін жыл сайын республикалық деңгейде өткізіледі. Жол-патруль қызметкерінің кәсібилігімен қатар, жылдамдығы, яғни шешімді заңға сәйкес әрі тез арада қабылдауы да басты назарда. Тағы бір мақсатымыз - аталған кәсіп иелерінің қоғам алдындағы беделін көтеру»,-деді Астана қалалық қоғамдық тәртіпті сақтау және жол қауіпсіздігін қамтамасыз ету басқарма бастығының орынбасары Еркін Мүслімов. Байқау келесі сынақтардан тұрады: - Құқықтық-нормативтік актілер, жол жүру қағидасы, оқ ату және қызметтік дайындығы бойынша теорияны білу; - Әкімшілік заңнаманы іс жүзінде қолдану; - Дене шынықтыру даярлығы; - Табельдік және автоматтық қарудан атыс даярлығы; - Жауынгерлік күрес даярлығы; - Алғашқы медициналық жәрдем көрсету; - Саптық даярлық бойынша практикалық тапсырмаларды орындау; - Жоғары қозғалыстағы жол қиылысында қолмен реттеу біліктілігі; - 3 түрлі көлікте жол қозғалысын маневрлеу (жеңіл, жүк көлігі және мотоцикл). Байқауға Астана, Алматы, Шымкент қалалары мен барлық облыс өкілдері қатысып жатыр. 4 күнге созылатын байқау 12 номинация бойынша бағаланады.
