«Тәуке хан мектебінде құрылған эвакуация пунктіндегілер қазір азық-түлікпен толық қамтамасыз етілген. Нан да бәріне жеткілікті, құдайға шүкір. Нан мәселесін айтар болсақ, көп келуіне байланысты ысырап болайын деп жатыр. Бірақ мүмкіндігінше таратуға тырысып жатырмыз», - деді видеодағы азамат.

Әрі қарай ол алдағы уақытта нанға қарағанда басқа азық-түліктің көбірек болғаны дұрыс екенін жеткізді.

«Сол нанды көбейтпей азайтып, басқа азық-түліктер келіп жатыр. Күнделікті қажетті көлемде ғана келсе дұрыс. Бүгінгі есеп бойынша, қазіргі таңда бұл пунктіде 106 адам бар. Бірақ тағы да адамдар келіп жатыр», - дейді ол.

Еске сала кетсек, 24 маусымда Арыс қаласында жарылыс болғанын хабарлаған едік. Оқиғаға қатысты Қорғаныс министрлігі пікір білдіріп, мән-жайды түсіндірді.

Түркістан облысының әкімі Өмірзақ Шөкеев өңірде төтенше жағдай жариялады. Қала тұрғындары толықтай эвакуацияланды.