Шаттығы шалқыған шаңырақ
Шаңырағы шаттыққа толы, ұл-қыздарына өнегелі тәрбие беріп, бүгінде соның жемісін көріп отырған мерейлі отбасылар аз емес. Солардың бірі – Әйтеке би кентіндегі Аралбаевтар әулеті десек артық айтқандық емес. Бұл күндері 6 баланы ыстық ұясынан ұшырған Уәли мен Айсұлу Аралбаевтар өздерін бақытты жандар санайды.Көп жылдар ауыл шаруашылығы саласында аянбай еңбек еткен Уәли Аралбайұлы бірнеше мәрте социалистік жарыстың жеңімпазы атанып, ІІІ дәрежелі “Даңқ” орденімен марапатталған. Әр жылдары Өркендеу, Абай, Бозкөл совхоздарының егіс даласында 1997 жылы денсаулығына байланысты зейнет демалысына шығамын дегенше жанқиярлықпен жұмыс істеді.
Көпбалалы отбасында өмірге келген Уәли мен “Күміс алқа” иегері Айсұлудың бас қосқанына биыл 50 жыл болды. Елі үшін еселі еңбек ете жүріп, балаларының барлығын оқытып-тоқытып, түгел аяқтандырды. Сыйластығы жарасқан ерлі-зайыптылар ұрпақтарын отансүйгіштікке, адамгершілікке, әдептілікке, үлкенді құрметтеуге тәрбиелеп, қандай жағдайда болса да қарапайым болуды үйретті.
– Ұл-қыздарымның барлығы жоғары білімді мамандар. Ұлымның үлкені Қазыбек теміржолда, Нұржаным мәдениет саласында еңбек етеді. Қыздарымның бірі – Елордада, қалғандары Тараз бен Қызылорда қаласында, Жанкент ауылында тұрмыста. Барлығы да тәрбиелі де тәртіпті.
“Келіні жақсының керегесі алтын”. Қолымдағы кенже ұлым Нұржанның келіншегі Жұлдыз да, үлкен келінім Айнұр да көргенді жердің балалары. Алдымыздан кесе өткен кезі болған емес. Жастар отау құрғаннан кейін де жарасты отбасына айналып кетуі үшін ата-ананың көмегі керек. Өйткені олар сәл қиындыққа шыдай алмай немесе бір-бірімен мінездері үйлеспей жатса, үлкендер сол кемшіліктің орнын толтырып, жымдастырып жіберсе, шаңырақ шайқалмайды, қайта шаттығы шалқи береді, – дейді Уәли аға.
Зайыбы Айсұлу Ақарысқызы екеуі тәрбиелеп өсірген алты ұл-қыздың тіршілігінен үнемі хабардар болып, оларға әрдайым қамқор болып отырады. Көкірегі ояу, көзі ашық Уәли аға балаларының әрқайсысының өз тіршілігін жолға қоюына жанашырлық танытуда. Немерелерін күнделікті балабақшаға апарып, алып келу ардагердің мойнында.
– Ер азамат – отбасының тірегі, қорғаушысы, дамытушысы, жетілдірушісі, яғни шаңырақтың аман сақталуының кепілі, жауапты тұлғасы, діңгегі. Отбасында әкенің орны бөлек. Демек, әкені ренжітпей, оның айтқанынан шығып отыру әрбір перзенттің басты парызы. Әйел-ана – шаңырақтың құты, бағы мен берекесі, ұйытқысы, тірегі, тұрмыстың сәні мен салтанаты. Аналық пен адалдықты аялап, азаматының қадір-қасиетін бағалап, абырой-атағын асқақтататын да әйел адам. Яғни әйел – отағасымен бірге шаңырақтың түтінінің түзу шығуына жауапты тұлға. Сондықтан бүгінгі күні мен балаларымның қуанышына масаттанып, жетістігіне мақтанамын. Немере-шөберелеріме «Еңбектің қандай қиыны болса да мойымай, ерінбей еңбек етіп, аталарыңның жолын қуыңдар» деп үнемі айтып отырамын, – дейді Айсұлу апа.
Уәли – Ұлы Отан соғысының ардагері Аралбай Бохаевтың отбасындағы 12 баланың үлкені. Сондықтан да ағайын-туысының, жекжат-жұрағатының садақа-тойларынан қалмай, қайғыда да, қуанышта да ортасында жүретін, ештеңеге бейжай қарамайтын оны бәрі сыйлайды, төбесі көрінбесе, іздеп жатады. Бұл – оның ауыл-аймағының алдындағы беделі мен абыройының арқасы болса керек.
Бүгінгі күні 26 немере, 2 шөбере сүйіп, бейнетінің зейнетін көріп отырған ақ шашты ата мен ақ жаулықты әже ұрпақтарының амандығын, ел-жұртының тыныш болуын тілейді.
Жеңісбек АЙЫМҚҰЛОВ
