Көпбалалы анаға көмек

“Адамның күні адаммен” деген даналық сөз бар. Бұл өмірге келген әрбір пенденің бір-біріне дос, бауыр, жанашыр бола жүруін меңзейді. Сонымен бірге тарыққанда қол ұшын беріп, қолғабыс көрсетуге шақырады.

Осындай өнегені ұлық тұтып, жүрегіне ізгілік пен адамгершілік қасиетті ұялатып, жанындағылардан қамқорлығын аямайтын азаматтар ортамызда аз емес. Сондай жарқын жүзді жандар қатарынан Ж.Жабаев атындағы №234 мектептің бастауыш сынып мұғалімдері де көрініп, үлгілі істің ұйытқысы атанды.

Мектеп табалдырығын алғаш аттаған балғын шәкірттерге қалам ұстауды үйретіп, білім жолына жетелеген ұстаздар жақында “Алтын алқа” медалінің иегері, көпбалалы Перизат Өтжанның отбасында болды. Он бір ұл-қыз өсіріп отырған алтын құрсақты жанға «теңізге тамған тамшыдай» болса да азық-түлік әкелді. Ардақты ана демеушілік көрсеткен ұстаздарға “Еңбектерің жансын, өмір жастарың ұзақ болсын!” деген алғысын жеткізді.