Қазалы Қазалы аудандық қоғамдық-саяси газет
» » Ауылына қарап, азаматын таны

Ауылына қарап, азаматын таны

Жанқожа батыр атымен аталатын ауылдың бүгінде тұрмысы жайлы. Ел әлеуетін әлдендіруге ауылдан түлеп ұшқан перзенттер де атсалысуда. Мұндағы мектеп, балабақша, мешіт, спорт кешені, мәдениет ошағы, орталық саябақ, өзге де әлеуметтік нысандар тұрғындар игілігіне қызмет етіп келеді. Осы орайда ауылдағы ағайынның туған жерден түлеген азаматтар мен атқа мінерлерге алғыстан басқа айтары жоқ.

Ауызбіршілігі берік Жанқожа батыр ауылының тұрғындары жуырда ғана тағы бір ізгілікті істі қолға алып, ұйымшылдықтың үлгісін танытты. 3 қаңтар күні «Əйтеке би – Бекарыстан би» бағытындағы аудандық маңызы бар жолдың Ақтан батыр ауылы мен Жанқожа батыр ауылы бөлігіне жəне ауылішілік көшелерге мекеме қызметкерлері мен жастар күш біріктіріп, құм төседі.

«Ауыл жастары хабарласып, ертең ауылға келетін күре жолға құм себеміз, таңертең «Камаз» көлігі дайын тұрады дегенде бірден қолдау көрсеттім. Ауыл жастарының ауызбіршілігі арқасында мұз құрсанып жатқан күре жолға құм себілді. Сөйтіп, азда болса мұздан келетін қауіпті сейілттік. Жұдырықтай жұмылып, еңбек еткен жігіттерге ризамын. Тілекші жандар да телефон арқылы ықыластарын жеткізіп жатыр. Жеке «Камаз» көлігімен келіп, көмек көрсеткен Жұмағұл ағаға да ризамыз», – дейді ауыл тұрғыны Рамазан Нұрым.

«Ауылына қарап, азаматын таны» деген осы шығар. Береке-бірліктің қаймағы бұзылмаған, татулық пен тұрақтылықтың бесігіне айналған бұл ауылды елін сүйер арда азаматтардың мекені десек қателеспейміз. Туған жерді түлетуге тамшыдай болса да үлес қосқан азаматтардың жасаған жарқын ісі көңіл қуантады.
Ұлболсын ТАЛАПБАЕВА
04 қаңтар 2019 ж. 345 0

Жаңалықтар мұрағаты

«    Тамыз 2019    »
ДсСсСрБсЖмСбЖс
 1234
567891011
12131415161718
19202122232425
262728293031