Отандық тәртіп сақшыларының жаңа жұмыс киімінің фотосуреттері ведомствоның Instagram-дағы ресми парақшасында жарияланды. ҚР ІІМ баспасөз қызметі әлеуметтік желіде атап өткендей, полицейлердің (патрульдік полиция) формасы соңғы рет 2005 жылы өзгерген және бүгінде ол заманауи талаптарға сай келмейді. 

"Нысанды киім-кешектерге қойылатын негізгі талаптар - оның қолайлылығы, тартымдылығы, ыңғайлылығы және артық элементтердің болмауы. Нысанды киімдердің дизайнына, дайындалуына қосымша қаражат талап етілмейді. Полиция қызметкерлері нысанды киім-кешектермен кезең-кезеңмен қамтамасыз етіледі. Ол ескірген нысанды киімді ауыстыруға бөлінетін жыл сайынғы қаражат есебінен жүзеге асырылатын болады", - делінген хабарламада.

Сондай-ақ, министрлік қазақстандықтардан ІІМ-нің Instagram әлеуметтік желісіндегі аккаунтында отандық полицейлердің нысанды киімінің жаңа үлгісін талқылауға қатысып, белсенділік танытуды сұрады. 

Бұған дейін ведомство басшысы Қалмұханбет Қасымов қазақстандық полицейлердің жаңа киімінің 98%-ы отандық материалдан тігілетінін хабарлаған болатын.