Жібек жолы көшесіндегі көпқабатты 3 үйдегі 15 пәтердің тұрғындары қаржы жинап баспаналарына «көгілдір отын» кіргізіп алған. Алайда, олар газ таратушы мекемемен келісім-шартқа отырмай, жеке «Патсайы» серіктестігінің қызметіне жүгініпті. Осыған байланысты, «ҚазТрансГаз Аймақ» АҚ ҚӨФ қызметкерлері заңсыз қосылған газ құбырын тұрғын үйден ажыратты.

Бұл туралы кеше өңірлік коммуникациялар қыз­метінде өткен брифингте облыстық энергетика және тұрғын үй-коммуналдық шаруашылық бас­қар­масының газ инфрақұрылымын дамыту және қауіпті өндірістік нысандарды мемлекеттік ба­қы­лау бөлімінің басшысы Олжас Исмалаев хабарлады.

– Газ құбырларын жүргізген жекеменшік мердігер мекеменің басшысының айтуынша, мекеме қызметкері басшысының қолын, мөрін өзі қойып, тұрғындармен заңсыз келісім-шарт жасағандығын мойындап отырған көрінеді. Қазіргі таңда мердігер мекеме – «Патсайы» ЖШС тұрғын үйлерді газға қосу үшін құжаттарын заңдастырып, филиал қызметкерлерімен бірлесіп жұмыс жасауда. Сондай-ақ, мекеме жетекшісі тұрғындарға газ беру жұмыстарын жеделдетінін мәлімдеді. Аталған мәселе басқарманың тікелей бақылауында, – деді О.Исмалаев.