Шуақ шашқан шаңырақ

Бүгіндері жетпістің ауылына ат байлаған Нұрлыбек Мұратов пен Шонық Махамбеталиеваны шәкендіктер айрықша құрмет тұтады. Екеуі де қарапайым еңбек адамдары. Нұрлыбек ұзақ жыл тау­арлы қой фермасында жүргізуші болса, Шонық та зейнеткерлікке жеткенінше мал шаруашылығының қат-қабат жұмыстарының бел ортасында болған.

Ынтымағы жарасқан ерлі-зайыптылар отбасында 4 ұл, 3 қыз тәрбиелеп өсірді. Қазіргі күні ұлдары ұяға, қыздары қияға қонды. Қос зейнеткер ұл-қыздарынан 26 немере, 9 шөбере сүйген ардақты ата, сүйікті әже. Бала-шағаларының қуанышына кенелген олардың бір шаңырақ астында түтін түтеткендеріне биыл 51 жыл толып отыр.

Осыған орай жақында Шәкен ауылдық кітапханасының ұйымдас­тыруымен мерейтой иелерінің құрметіне «Шуақ шашқан шаңырақ» атты кеш өткізілді.

Кеш шымылдығын ауылдық округ әкімі Т.Сермаханов сөз сөйлеп ашып, ізгі тілегін жеткізді. Бұдан кейін ауыл тұрғындары С.Көбесов, Ж.Махамбетжан, Қ.Ома­ров тағы басқалары мінбер төріне шығып, жылы лебіздерін арнады. «Алтын тойлары» аталып өтіп жатқан жандардың ауылдың өсіп-өркендеуіне қосқан лайықты үлестерін атап өтті. Бала тәрбиесіндегі, отбасындағы сыйластықтарын үлгі етті.

Әсерлі кеш үстінде ән мен күйден шашу шашылып, мың бұрала би биленді.

Мерейлі отбасы иелеріне сый-сияпаттар тапсырылды. Кеш кейіп­керлері жиналғандарға шынайы көңілден шыққан алғыстарын жаудырды.