«Еліміздің пойыз паркінде 2500 вагон бар. Бүгін құрам тағы 50 жаңа вагонмен толығып жатыр. Вагондар өз елімізде жасалған, «ЗИКСТО» АҚ (Петропавл) өнімі. Осы қыркүйекте тағы 100 вагон сатып аламыз, ал келесі жылы жаңа вагондардың қатарын 157-ге апармақпыз. Тағы бір айта кететіні, отандық өнімге мән беріп отырмыз. 2025 жылы «Штадлер Қазақстан» швейцариялық компаниясы өз өнімдерін шығара бастайды. Бес жылдың ішінде 537 вагон шығару жоспары бар», - деді Көлік комитетінің төрағасы Әли Алтай жаңа вагондарды қабылдау барысында.

Оның мәліметінше, «Жолаушылар тасымалы» АҚ вагондарының 49% тозған. Сондай-ақ, спикер қолданысқа берілгеніне 40 жыл болған вагондар барын айтты.

«Жаңа вагондар заманауи әрі ыңғайлы. Қажетті жағдай жасалған. Әр вагонда душ, желдеткіш (кондиционер) және мүгедек жандарға бөлек орын мен жүріп-тұруына жағдай бар», - дейді комитет басшысы.

Айта кетейік, бүгін елордаға отандық «ЗИКСТО» зауытының заманауи плацкарт және купе жолаушылар вагондарының бірінші партиясы жеткізілді.

Жаңа 50 вагон Қарағанды - Жезқазған, Атырау - Маңғыстау, Атырау — Ақтөбе бағыттарында қатынайды.

Бұған дейін елімізде 654 ескі вагон жолаушы тасымалдап жүргенін хабарлаған едік.