«Бесік жыры» анимациялық фильмі шетелде үздік атанды
Отандық «Бесік жыры» қысқаметражды анимациялық фильмі Үндістанда өткен Roshani International film 2023 фестивалінде «Үздік анимациялық фильм» жүлдесін жеңіп алды, деп хабарлайды egemen.kz Мәдениет және спорт министрлігі баспасөз қызметіне сілтеме жасап.Roshani International film 2023 фестивалі биыл төртінші мәрте өткізіліп отыр. Байқауға әлем елдерінен 1 300-ге жуық жұмыс ұсынылған. Оның ішінде 132 анимациялық фильм көрсетілген. Dala animation шығармашылық ұжымы дайындаған «Бесік жыры» мультфильмі қазылардың ең жоғары бағасына ие болды.
«Айта кету керек, бұл «Бесік жыры» анимациялық фильмінің алғашқы жүлдесі емес. Қазақстандық мультфильм мамыр айында Испания астанасы Мадридте өткен беделді кинофестивальде «Ең үздік қысқаметражды анимациялық фильм» жүлдесін жеңіп алған еді. Ол байқауға 1 500 анимациялық жұмыс ұсынылғанын айта кеткен жөн», деді ҚР МСМ Мәдениет комитетінің төрағасы Арман Жүдебаев.
