Базар бағасы бақылауда
Бүгінгі күні базар бағасына шағымданатындар көп. Орынды. Өйткені базар сөрелеріндегі азық-түлік құны көңілге қонымсыз. Бір орыннан екінші жердегі баға екі түрлі. Мұны арнайы барып та көрдік. Артынша көрген түйгенімізбен «Бағаға тоқтам бола ма?» деп арнайы мақала дайындап, газет бетіне жарияладық.Жуырда негізсіз баға өсіруге жол бермеу үшін аудандық мәслихат хатшысы Бақытжан Жарылқап, аудан әкімінің орынбасары Күнтілес Назымбеков, аудандық мәслихат депутаты Ғазиз Әліш және аудандық ауылшаруашылығы бөлімінің басшысы Нұрлан Аманбай аудан орталығындағы бірқатар сауда орындарында болды. Әлеуметтік маңызы бар азық-түлік өнімдерінің бағалары мен олардың қорларын көзбен көріп, танысып шықты.
Сауда орындарын аралау барысында халық күнделікті көп тұтынатын негізгі өнім түрлері қорының үзілмеуіне аса мән беріліп, әлеуметтік маңызы бар азық-түлік тауарлары, оның ішінде бірінші қажеттіліктегі нан, сүт өнімдерінің бағасын шекті бағадан асырмау жөнінде кәсіп иелеріне ескертілді.
Негізі аудан тұрғындары азық-түлік тауарларының қорына күмәнданбаса болады. Барлығы жеткілікті. Бірақ сырттан тасымалданатын кей өнім түрлері бойынша, ол жақтағы өндірушілер мен көтерме өткізушілер тарапынан бағалардың құбылып тұрғаны белгілі болды. Дегенмен бұдан кейін бағаның негізсіз өспеуі басты назарда болады.
Абзал БАҚЫТҰЛЫ
