Биыл жергілікті бюджеттен Қазалы қаласының санитарлық тазарту жұмыстарына 7 673,0 мың теңге, көркейту, көгалдандыру және абаттандыру жұмыстарына 10 833,0 мың теңге қаржы бөлініпті. Қазіргі уақытта аталған жұмыстардың жеңімпаз мердігер «Қазалы Келбеті–2019» ауылшаруашылық өндірістік кооперативі тиісті жұмыстарды атқаруда. Қыруар қаржы қаралған істің қарқыны қандай екенін білмекке қала көшелерін бір сүзіп шықтық.

Қаланың тазалығын қадағалап, көркіне көрік қосуға септігін тигізеді деген ниетпен аудандық жұмыспен қамту орталығының жолдамасымен 30 адам ақылы қоғамдық жұмысшы негізінде жұмысқа алынған. Әкімдік қызметкерлерінің айтуынша, 2022 жылдың 19 наурыз - 19 мамыр аралығында Қызылорда облысы әкімдігінің тапсырмасына сәйкес «Birge: Taza Qazaqstan» экологиялық акциясы аясында жалпыхалықтық тазалық сенбіліктері мен ағаш егу шаралары Қазалы қаласы бойынша жоғары деңгейіде ұйымдастырылған. Аталған іс-шара кезінде қаладағы барлық 21 мекеме мен кәсіпорындардың келісімдері бойынша Қазалы қаласындағы 45 шақырымды құрайтын 49 көше, шет аймақтар, «Ноғай», «Жеті боздақ», «Орыс» қорымдарының айналасы, алаңдар мен саябақтар және скверлер толықтай тазартылған.

Мекеме, кәсіпорындар арасында қазіргі уақытқа дейін 15, 19, 26 наурыз және 2,9 сәуір күндері жалпы 5 мәрте сенбілік ұйымдастырылған. Аталған сенбіліктерге мекеме, кәсіпорындардан 574 қызметкерлер қатысып, арнайы 2 техникамен (ГАЗ-53, Трактор) жалпы көлемі 38 тонна күл-қоқыс жинақталып тұрмыстық қатты қалдықтарды төгетін орынға шығарылған. Сонымен қатар қаланың шет аймағында орналасқан ұзындығы 2 шақырымды құрайтын «Темір бетонды латоктың» 320 метрі тазаланып, көше жолының жиегінде орналасқан 3800 метр құрайтын бордюрдің 1400 метрі ақталған. Көше бойындағы түнгі жарықшамдар мен аялдамалар жуылып, тазаланған.

«Birge: Taza Qazaqstan» экологиялық акциясы аясында жалпыхалықтық ағаш егу шарасын өткізу мақсатында Қазалы қаласынан Ақтан батыр ауылына шыға беріс жолының жиегінен ашылған көлемі 0,750 гектар жер учаскесіндегі «Жасыл белдеуге» мекеме аулаларына және көшелердің бойына қаладағы мекеме, кәсіпорындармен бірлесіп 700 дана тал көшеттері мен қаламшалар отырғызылған. Бұған қоса алдағы уақытта көше бойындағы түнгі жарықшам бағаналарын, бағдаршам тұғырларын, алаңдар мен саябақтардың темір қоршауларын, орындықтарын және аялдамаларды сырлау, тал ағаштарының түптері мен жол жиегіндегі бордюрлерді ақтау жұмыстары жүргізілген.

– Сырдария өзеніне аз көлемде су жиналу салдарынан аймағымызда су тапшылығы орын алуда. Бұған қарамастан қаржының көлеміне қарай бекітілген кестеге сәйкес аяқ су уақытылы беріліп келеді. Осыған орай, биылғы жылға Қазалы қаласының көше бойы мен саябақтардағы тал ағаштарына және тұрғындардың үй іргелік бақшалық жерлеріне аяқ су беру кестесіне өзгерістер енгізіп отырмыз. Қаланың батыс беткейінде орналасқан СНП-500/10 маркалы насос арқылы аптасына 4, оңтүстік шығыс жақ беткейінде орналасқан СНП-500/10 маркалы насос арқылы аптасына 3 және солтүстік беткейінен арнайы жылжымалы насоспен аптасына 3 күн аяқ су беру қолға алынды.

Қаланың батыс жақ беткейіндегі насос ескі болғандықтан өткен жылы қиындықтар туындаған болатын. Осыған орай, Қызылорда облысының табиғи ресурстар және табиғат пайдалануды реттеу басқармасына өткен жылы 1 дана жаңа СНП-500/10 маркалы насосқа ұсыныс берілген болатын. Қазіргі таңда аталған басқармадан жаңа насос беріліп, іске қосылды, – дейді қала әкімі Рахметулла Ізтілеу.