Коронавирус өршіді, тойға тыйым салына ма?
Қазақстанда коронавирус инфекциясына шалдығу жағдайы артқан кезде енгізілуі мүмкін шектеу нұсқалары қарастырылып жатыр. Бұл туралы ДСМ Инфекциялық ауруларды эпидемологиялық бақылау басқармасының басшысы Роза Қожапова айтты, деп хабарлайды ҚазАқпарат.Орталық коммуникациялар қызметіндегі баспасөз мәслихатында ол той және басқа да бұқаралық іс-шараларды өткізуге тыйым салу мүмкіндігіне қатысты сауалға жауап берді. «Бүгінде «сары» аймаққа мұндай шектеулер енгізу қарастырылмаған. Дегенмен, «қызыл» аймаққа өткен жағдайда шектеуді екі кезеңмен енгізу көзделеді. Бірақ, бұл іс-шараны қазіргі уақытта «Атамекен» палатасымен талқылап жатырмыз», - деді басқарма басшысы. Оның атап өтуінше, барлық шешім ведомствоаралық комиссияда келісілгеннен кейін ғана қабылданатын болады. «Бүгінде «сары» аймақта той және басқа да іс-шараларды өткізуге шектеу енгізу қарастырылып отырған жоқ», - деді Роза Қожапова.
