«Кентавр» деп аталатын коронавирустың жаңа түрі 2022 жылдың мамыр айында, Үндістан елінде табылды. Содан бері вирус оннан астам елге, соның ішінде Ұлыбритания, АҚШ, Австралия мен Германия және Канада елдерінде белең алды.

Гамалея эпидемиология және микробиология ғылыми-зерттеу орталығының бас ғылыми қызметкері, вирусолог Анатолий Альтштейн жақында ғана табылған «Кентаврдың» қауіптілігін бағалады.

– Көп елге дүрбелең тудырған BA.5 вирусы аяқталуға жақын. Қазір күніне бір миллионға жуық жағдай тіркеліп жатыр. Бұл қаңтар және ақпан айларымен салыстырғанда айтарлықтай аз. Жаман айтпай, жақсы жоқ. Бірақ, «Кентавр» бізге де жетуі мүмкін. Алайда, мен оны өте ауыр болады деп айта алмаймын, – дейді маман.

Мамандардың айтуынша, коронавирустың бұл түріне шалдыққан науқаста дене температурасының жоғарылауы, әлсіздік, бас ауруы мен бұлшықет ауыруы, іштің ауыруы және иіс жоғалуы сынды белгілері болады. Яғни, «Кентаврдың» алғашқы белгілерінің «Омикроннан» еш айырмашылығы жоқ дейді.

Қазіргі таңда, елде алдын алу шаралары жасалынып, «PFIZER» екпесін салушылар саны артып келеді. Мәселен, алғашқы компонентін салдырғандар саны – 1 229 826-ға жетсе, ал екінші компонентін – 1 168 972 адам қабылдаған.

Айта кетейік, Қазақстанда коронавирус жұқтырғандар саны күрт өсе бастады.