Қазалы аграрлы-техникалық колледжінде ұйымдастырылған шараны аудан әкімінің орынбасары Дәурен Тілеумбетов ашып, Кеңес Одағы тұсындағы солақай саясатқа қарсы елі үшін күрескен боздақтардың арасында біздің жерлестеріміз де бар екенін айтты.

– Сол зұлмат біздің аймағымызды да айналып өткен жоқ. Қазалылықтар арасында кезінде білім бөлімін басқарған Нұржан Баубеков, Қазақстан Республикасы Жоғарғы Сотының Төрағасы болған Қазмұхамед Күлетов сияқты 400-ге жуық жерлестеріміз қуғын-сүргін құрбаны болды. Кейін олардың барлығы да ақталды.

Кезінде қуғын-сүргінге түскен шешен, кәріс, Орал казактары мен басқа да ұлт өкілдері Қазалы жеріне қоныс аударды. Оларға қонақжай халқымыз қамқорлығын көрсетті. Бүгінде өсіп-өнген, ұрпақ жайған олар бір-бірімен құда-жекжат болып, ауданымызда тату-тәтті өмір сүріп жатыр, – деді Дәурен Оңғарбайұлы.

Мұнан соң №234 орта мектептің тарих пәнінің мұғалімі Мейрамбек Дәкібаев «Кеңес Үкіметінің алғашқы жылдарында (1918-1921 ж.ж.) «Ақ келіп атып кетті, қызыл келіп қырып кетті», №226 мектеп-гимназияның тарих пәнінің мұғалімі Асқар Олжакеш «1928-1938 жылдардағы күштеп ұжымдастыру мен саяси қуғын-сүргін жаңғырығына арналған «Асыра сілтеу болмасын, аша тұяқ қалмасын» тақырыптарында баяндама жасаса, ардагер-ұстаз Қадірбек Бекетұлы саяси қуғын-сүргін және ашаршылық зардаптары мен тарихи ақтаңдақтардың негізгі кезеңдеріне тоқталды.

Сондай-ақ, аудандық мәдениет және тілдерді дамыту бөлімінің басшысы Болат Жолтаев, сол бір зобалаң жылдарда жазықсыз құрбан болған асыл азаматтарымыздың көзін көрген Оразғали Бекбанов пен саяси қуғын-сүргін құрбандарының артында қалған ұрпақтары Күлмараш Өтепберген мен Мафруза Текеевалар да естеліктерімен бөлісті.

#Қазалы