– Мемлекет басшысы Қасым-Жомарт Тоқаев «Тәуелсіздік бәрінен қымбат» атты мақаласында «бостандық бізге оңайлықпен келген жоқ. Ата-бабаларымыз азаттық жолында арпалысты. Талай зұлмат замандар мен нәубеттерді бастан өткерді. Осының бәрі халықтың есінде сақталып, ұрпақтан ұрпаққа берілуге тиіс» деген болатын. Сонымен қатар, президиентіміз біртуар тұлғаларды еске алып, олардың мұрасын жастарымызға және бүкіл әлемге паш етудің мәні зор екенін, осы мақсатта еңбек етіп жүрген ғалымдар мен жазушыларды қолдау қажеттігін тілге тиек етті.

17-18 ғасырларда өмір сүрген қазақтың көрнекті билерінің бірі Кедей би Жәнібекұлы мен заманында халықты руханиятпен сусындатқан, мыңдаған шәкірт тәрбиелеген Мағзаман, Ақназар әулиелерді ұлықтауға арналған «Тұлға. Тарих. Тағылым» атты ғылыми-танымдық конференция осы мақсаттың үдесінен шығады.

Президент айтқандай, бұл – тарихи сананы жаңғыртуға тамшыдай болса да үлес қосатын мағыналы басқосу. Шынында біз ерен ерлігімен, еңбегімен халқымызды қиындықтардан сүріндірмей алып шыққан Кедей би, Ақназар әулие сынды тұлғаларды ұрпаққа дәріптеуіміз керек. Бұл бағытта зиялы қауыммен, ғалымдармен, руханият, тарих жанашырларымен бірлесіп сүбелі істер атқарамыз деп ойлаймын, – деген еді.

Ата рухына ас беру – тек рухани шара ғана емес, қоғамды салауатты өмір салтын ұстануға, ұлттық спортты ұлықтауға шақыратын үрдіске айналып үлгерді. Шөмекей аталығына берілген аста спорттың бірнеше түрінен сайыс өтіп, жүлдесіне қомақты қаржы тігілгенін айттық. Бәрінен бұрын делебесі қозып, ай-хайға басқан жұртқа бәйгеден асқан бәсеке болмады. Көлік үстіне жармаса мінген көрермен тамаша тартыстың, жануар жүйріктігінің куәсі болды. Атжарыстан Нұрлан Қанат бейнетаспасына басып алған репортажды назарларыңызға ұсынамыз.