Аудан әкімі кәсіпкерлермен кездесті

Аудан басшысы алдымен Бауыржан Бисенмен кездесті. Ол қазіргі таңда Т.Бокин көшесінен аумағы 3 гектар болатын жерге құрылыс материалдарын сататын базар салып жатыр. Аудан орталығының шет аумағынан салынатын базардың өз тиімділігі бар. Құрылыс заттарын алатын тұрғындар Әйтеке би кентінің орталығына бармай-ақ, осы жерден сатып ала алады.

Мұнан соң аудан әкімі Мұхтар Оразбаев құрылыс жұмыстарына қажетті материалдар шығаратын цехтың жұмысымен танысты.

Қазіргі таңда цехта брусчаткалардың түр-түрі шығарылуда. Сонымен қатар, мұнда тұрғын үй салуға қажетті газоблоктың да бірнеше түрі бар. Цехта 6 адам тұрақты жұмыспен қамтылған. Бұл туралы өндіріс орнының жауапты қызметкері Самат Аманов айтып берді.

Аудан әкімі Мұхтар Оразбаевпен кездескен жеке кәсіпкер алдағы жоспарларымен бөлісіп, жеңілдетілген несие алуға көмек көрсетуді сұрады. Егер пайызы аз несиеге қол жеткізетін болса, ағаш кесетін станок пен материал тасымалдайтын көлік сатып алмақшы. Осылайша аудан халқы тұрғын үй салу үшін алатын құрылыс ағаштарының бағасын төмендетпек.

Аудан әкімі Мұхтар Оразбаев тиісті сала басшыларына жеке кәсіпкерге құқықтық көмек көрсетіп, түрлі мемлекеттік бағдарламаларға ұсынуға тапсырма берді.