Суландыру ісі сәтімен
Биыл су тапшылығы, қуаңшылық мәселесі көпті алңдатқан қиындыққа айналды. Даладағы жұрт төрт-түлікке шөп таппай қиналса, бау-бақшасы бар, егістікпен айналысып отырған ағайын суаратын су келмей қалуынан қорқады. Әрине, кім де болса еңбегінің жемісін көргісі келеді. Бірақ тіршілік нәрін жеткізу ісі жауаптылар үшін оңай болып отырған жоқ. Қиындықты жеңілдету үшін бірнеше ай бұрын өңірде күріш алқабын азайту туралы мәселе қойылды. Бұдан да басқа келеңсіздіктердің келісіп шешу үшін жақында облыс әкімінің орынбасары Бахыт Жаханов Қазалы ауданында болды.Өңір басшысының орынбасары алдымен су мәселесі туындаған бірқатар нысандарға барып, далалықтың жай-күйін бақылады. Сондай-ақ Қазалы орман шаруашылығы мекемесінің орман тұқымбағының жұмысымен танысты. Қазіргі таңда мұнда сырталы, үйіңкі, қарағаш ағаштары өсірілуде.
Бұдан бөлек өңірден келген өкіл ауданда қашыртқы суын қайта пайдалану мақсатында К-2-1 қашыртқысынан Оң жаға магистралді каналына насос қондырғысы арқылы су беру мәселесін пысықтады. Салалық уәкілетті мемлекеттік орган басшылары мен сала мамандары қатысқан басқосуда К-2-1 қашыртқысынан Оң жаға магистралді каналына насос қондырғысы арқылы су беру жолдары қаралып, насос қондырғысын орнату туралы шешім қабылданды.
Р.ҚАЙРАТҰЛЫ
