223 мың теңге: Қазақстандағы орташа жалақы туралы тағы айтылды

Қазақстандықтардың орташа айлық атаулы жалақысы 223 мыңнан асты. Бұл туралы Стратегиялық жоспарлау және реформалар агенттігі Ұлттық статистика бюросының ресми сайтында жарияланды, деп хабарлайды egemen.kz

  «2021 жылғы қаңтарда халықтың орта есеппен жан басына шаққандағы атаулы ақшалай табыстарын бағалау бойынша 115684 теңгені құрады, бұл 2020 жылғы қаңтарға қарағанда 4,8% жоғары, нақты ақшалай табыс көрсетілген кезеңде 2,4% төмендеді.
Сондай-ақ 2021 жылғы ақпанда бір қызметкердің орташа айлық атаулы жалақысы бағалау бойынша 223213 теңгені құрады», делінген хабарламада.
ХЕҰ әдістемесі бойынша анықталған жұмыссыздар саны 2020 жылғы IV тоқсанда 453 мың адамды құрады. Жұмыссыздық деңгейі жұмыс күші санына 4,9% құрады.
Ал жұмыспен қамту органдарында жұмыссыздар ретінде тіркелген адамдар саны 2021 жылғы ақпаның соңына 192 мың адамды құраған.