Жастар көп тұтынатын Dizzy, Gorillа сынды құрамында энергетикасы химиялық қоспалар болатынын бірі білсе, бірі білмейді. Ол ас қорыту жүйесіне әсер етіп, қан айналымын бұзады.

Ғалымдардың пайымдауынша, мұндай сусындарды жиі немесе шамадан тыс қолдану түрлі ауруға шалдықтырады. Сонымен қатар құрамында кездесетін көп мөлшердегі қант артық салмақтың пайда болуына әрі адамның қант диабетіне шалдығуына ықпал етеді. Газдалған сусындардың тіске де зияны бар. Ол маржанды қарайтып, тіс жегінің пайда болуына алып келеді.

Ал өзіміз жақсы көретін, жеңіл тағамдармен жиі қолданатын Coca-cola жер шарының барлық бөлігінде ішілетін сусын қатарында. Сұранысқа ие тауардың сөреден түспеуінің себебі осы болса керек. Әйтсе де қолданыстағы сусынның адам денсаулығына айтарлықтай кесірі дәлелденуде. Coca-cola-ны жиі пайдалану адам бойында кездесетін кальций, фосфор сынды элементтердің жойылуына әкеледі. Онымен қоса балалардың ойлау қабілетінің нашарлауына әсер етеді. Құрамын зерттеген америкалық ғалымдар рак ауруының туындау қаупі зор екендігі және оның құрамында кездесетін реакциялық қосындылар адам ағзасына түскенде бауырға кері әсер тигізетінін байқаған.

Мамандар мұндай сусындар жасөспірімдер үшін зиян екендігін айтса да, күндегі әдетпен балалардың қалауын орындаудамыз. Аталған тауарларды бала денсаулығы үшін пайдалы, құнарлы және табиғи өнім, яғни жеміс-жидектерден арнайы сығылып дайындалған сусынмен алмастыруды қазірден үйренуіміз қажет.

Бүгінде жоғарыда аталған дайын өнімнен бөлек Coca-cola, Pepsi, Fanta, Sprite және тағы да басқа сусындардың саудасы жүріп тұрған мезгіл. Бірақ денсаулығымызға тигізер зиянын біле тұра тұтынатнымыз өкінішті. «Шөліркеген уақытта шөліңді басады», – деп мұндай сусындарды ала берудің қажеті жоқ. Аз ғана уақыт шөліңді басқан алдамшы дүниенің айықпас дертке ұшырататынын естен шығармаңыз.